24-iyun kuni O‘zbekiston delegatsiyasining Turkiy tilli davlatlar Parlament assambleyasi (TurkPA) XI yalpi yalpi majlisidagi ishtiroki doirasida Oliy Majlis Senati raisi Tanzila Norboyeva Turkiy davlatlar tashkiloti (TDT) bosh kotibi Bag‘dod Amreyev bilan uchrashdi. Bu haqda parlament yuqori palatasi matbuot xizmati xabar berdi.
Uchrashuvda Turkiy davlatlar tashkilotiga a’zo mamlakatlar o‘rtasidagi munosabatlarni turli sohalarda, shu jumladan, TurkPA doirasida yanada rivojlantirish masalalari yuzasidan fikr almashilgan.
O‘zbekiston 2019-yilda Tashkilotga qo‘shilganidan buyon TDT faoliyatida faol ishtirok etayotganini ta’kidlab, Bag‘dod Amreyev mamlakatda davlat va jamiyat qurilishi, ishbilarmonlik va tadbirkorlik muhitini yaxshilash sohasida amalga oshirilayotgan keng ko‘lamli o‘zgarishlarni, respublika tomonidan Markaziy Osiyo mamlakatlari bilan do‘stlik va yaxshi qo‘shnichilik munosabatlarini mustahkamlash, shuningdek, Turkiy davlatlar tashkiloti doirasida hamkorlikni kuchaytirish bo‘yicha ko‘rilayotgan choralarni yuqori baholagan.
Uchrashuvda tomonlar TDTga a’zo davlatlar o‘rtasida savdo-iqtisodiy va investitsiya aloqalarini mustahkamlashda mazkur tashkilot rolini oshirish bo‘yicha prezident Shavkat Mirziyoyevning tashabbusini amalga oshirish jarayonini, xususan, Turkiy taraqqiyot bankini tashkil etish masalasini ham muhokama qilgan.
Uchrashuv yakunlariga ko‘ra, 2022-yilning kuzida Toshkentda bo‘lib o‘tadigan TDT sammiti doirasida rasman ta’sis etilishi rejalashtirilayotgan Turkiy investitsiya fondini ishga tushirishga tayyorgarlik jarayonini tezroq yakunlash bo‘yicha kelishuvga erishilgan.
Avvalroq Tanzila Norboyeva boshchiligidagi O‘zbekiston parlamenti delegatsiyasi Cho‘lpon-ota shahrida (Qirg‘izistonda) bo‘lib o‘tgan Turkiy tilli mamlakatlar parlament assambleyasining (TurkPA) XI yalpi majlisida ishtirok etgani to‘g‘risida xabar berilgandi.
Eslatib o‘tamiz, 2021-yilning iyunida O‘zbekiston TurkPAga a’zo bo‘lish to‘g‘risida qaror qabul qilgandi.
Izoh (0)