Bosh konsulxona xodimlari Novgorod viloyatida Ikkinchi jahon urushi davrida halok bo‘lgan to‘rt nafar o‘zbekistonlik askar jasadlarini qayta dafn etish marosimida qatnashdi. Bu haqda “Dunyo” agentligi xabar berdi.
Ma’lum qilinishicha, Novgorod viloyati Demyansk tumani, Lichkovo qishlog‘ida “Lichkovo” qidiruv otryadi tomonidan Ikkinchi jahon urushi vaqtida vafot etgan jami 44 nafar jangchilarning qoldiqlari aniqlangan. Ular orasida Qoraqalpog‘istonda 1913-yilda tug‘ilgan Alambergem Shalambayev, 1906-yilda Buxoro viloyatida tug‘ilgan Nikifor Losev, 1917-yilda Toshkent viloyatida tug‘ilgan Targumbay Mintayev va 1904-yilda Toshkent viloyatida tug‘ilgan Sultan Rasulyevning jasadlari ham bor. Tashrif davomida ushbu vatandoshlarning xoki hurmat-ehtirom bilan qayta dafn etilgan.
Marosimda mahalliy okrug ma’muriyati rahbarlari, tuman kengashi deputatlari va jurnalistlar qatnashgan. Askarlarning yorqin xotirasiga hurmat belgisi sifatida ularning yodgorlik peshtoqiga gulchambar qo‘yilgan va Qur’on tilovat qilingan.
O‘zbekiston Bosh konsulxonasi xodimlari, shuningdek, Yaroslav Mudriy nomidagi Novgorod davlat universitetida tahsil olayotgan o‘zbekistonlik talabalar bilan uchrashuv o‘tkazgan. Ayni vaqtda ushbu oliy bilim yurtida 20 nafardan ortiq o‘zbekistonlik talabalar bakalavr va magistr yo‘nalishlarida tahsil olmoqda.
Muloqot davomida talabalar bilan O‘zbekistonning Sankt-Peterburg shahridagi Bosh konsulxonasi, Butunjaxon yoshlar assotsiatsiyasi koordinatori faoliyati haqida so‘zlab berilgan.
“O‘zbekiston vakillari, shuningdek, Novgorod viloyati Bojonka qishlog‘ida joylashgan parrandachilik fabrikasida vaqtincha mehnat qilayotgan yurtdoshlarimiz holidan xabar oldi. Ayni vaqtda ushbu fabrikada 100 nafardan ortiq o‘zbekistonlik fuqaro vaqtincha mehnat faoliyatini amalga oshirib kelmoqda. Suhbat chog‘ida hozirgi kunda O‘zbekiston rahbariyati tomonidan xorijiy davlatlarda ishlayotgan fuqarolarimizning haq-huquqlarini himoya qilishga qaratilayotgan e’tibor alohida ta’kidlandi. Vatandoshlarimizninig konsullik-huquqiy va migratsiya masalalariga oid barcha savollariga batafsil javob berildi”, — deyiladi xabarda.
Eslatib o‘tamiz, 2021-yilning mayida Ikkinchi jahon urushi vaqtida bedarak yo‘qolgan o‘zbek askarining xoki vatanga olib kelingandi.
Izoh (0)