Новгородда Иккинчи жаҳон уруши даврида ҳалок бўлган 4 нафар ўзбекистонлик аскар жасадлари аниқланди

Бош консулхона ходимлари Новгород вилоятида Иккинчи жаҳон уруши даврида ҳалок бўлган тўрт нафар ўзбекистонлик аскар жасадларини қайта дафн этиш маросимида қатнашди. Бу ҳақда «Дунё» агентлиги хабар берди.

Маълум қилинишича, Новгород вилояти Демянск тумани, Личково қишлоғида «Личково» қидирув отряди томонидан Иккинчи жаҳон уруши вақтида вафот этган жами 44 нафар жангчиларнинг қолдиқлари аниқланган. Улар орасида Қорақалпоғистонда 1913 йилда туғилган Аламбергем Шаламбаев, 1906 йилда Бухоро вилоятида туғилган Никифор Лосев, 1917 йилда Тошкент вилоятида туғилган Таргумбай Минтаев ва 1904 йилда Тошкент вилоятида туғилган Султан Расулевнинг жасадлари ҳам бор. Ташриф давомида ушбу ватандошларнинг хоки ҳурмат-эҳтиром билан қайта дафн этилган.

Маросимда маҳаллий округ маъмурияти раҳбарлари, туман кенгаши депутатлари ва журналистлар қатнашган. Аскарларнинг ёрқин хотирасига ҳурмат белгиси сифатида уларнинг ёдгорлик пештоқига гулчамбар қўйилган ва Қуръон тиловат қилинган.

Ўзбекистон Бош консулхонаси ходимлари, шунингдек, Ярослав Мудрий номидаги Новгород давлат университетида таҳсил олаётган ўзбекистонлик талабалар билан учрашув ўтказган. Айни вақтда ушбу олий билим юртида 20 нафардан ортиқ ўзбекистонлик талабалар бакалавр ва магистр йўналишларида таҳсил олмоқда.

Мулоқот давомида талабалар билан Ўзбекистоннинг Санкт-Петербург шаҳридаги Бош консулхонаси, Бутунжахон ёшлар ассоциацияси координатори фаолияти ҳақида сўзлаб берилган.

«Ўзбекистон вакиллари, шунингдек, Новгород вилояти Божонка қишлоғида жойлашган паррандачилик фабрикасида вақтинча меҳнат қилаётган юртдошларимиз ҳолидан хабар олди. Айни вақтда ушбу фабрикада 100 нафардан ортиқ ўзбекистонлик фуқаро вақтинча меҳнат фаолиятини амалга ошириб келмоқда. Суҳбат чоғида ҳозирги кунда Ўзбекистон раҳбарияти томонидан хорижий давлатларда ишлаётган фуқароларимизнинг ҳақ-ҳуқуқларини ҳимоя қилишга қаратилаётган эътибор алоҳида таъкидланди. Ватандошларимизниниг консуллик-ҳуқуқий ва миграция масалаларига оид барча саволларига батафсил жавоб берилди», — дейилади хабарда.

Эслатиб ўтамиз, 2021 йилнинг майида Иккинчи жаҳон уруши вақтида бедарак йўқолган ўзбек аскарининг хоки ватанга олиб келинганди.