Молдова собиқ президенти Игорь Додон 27 июнь куни, уюшган жиноий гуруҳ манфаатлари йўлида мансаб ваколатини суиистеъмол қилганликда айбланди, дея хабар берди «Интерфакс»га республика Бош прокуратураси матбуот хизматига таяниб.
Хабарда айтилишича, айблов унинг 2008-2009 йилларда бош вазир ўринбосари, Иқтисодиёт ва савдо вазири лавозимларида қилган ҳаракатлари билан боғлиқ. Қайд этилишича, Додон томонидан имзоланган хулоса асосида Energocom давлат компанияси Молдовага мамлакат учун ноқулай шартларда электр энергияси етказиб бериш бўйича шартнома имзолаган.
«Ушбу ҳаракатлар натижасида давлатга 11,9 миллион АҚШ доллари миқдорида зарар етказилган, кейинчалик улар айрим офшор компанияларнинг ҳисоб рақамларига ўтказилган. Шу билан бирга, бу ҳаракатлар электр энергияси тарифларининг ошишига олиб келган, бу эса якуний истеъмолчилар —Молдова фуқароларнинг ҳуқуқларига таъсир қилган», дейилади прокуратура баёнотида.
Қайд этилишича, собиқ президент ушбу айбловни тан олмаган.
Молдованинг собиқ президенти Додон 24 майдан бери уй қамоғида. У уйи, идоралари, ота-онасининг уйи ва бошқа биноларида узоқ давом этган тинтувлардан сўнг ҳибсга олинган. Собиқ президент Жиноят кодексининг тўрт моддаси бўйича айбланган: пассив коррупция, сиёсий партия томонидан жиноий ташкилотдан маблағ олиш, ноқонуний бойиб кетиш ва давлатга хиёнат.
Додон ва унинг партияси унга нисбатан қўзғатилган жиноий ишни президент Майя Санду томонидан сиёсий репрессия ва мухолифатга босим ўтказиш сифатида баҳоламоқда.
Изоҳ (0)