O‘zbekiston prezidentining vakolat muddatini 5 yildan 7 yilgacha uzaytirish rejalashtirilmoqda. Bu haqda 25-iyun kuni jamoatchilik muhokamasiga qo‘yilgan Konstitutsiyasiga o‘zgartishlar kiritish to‘g‘risidagi qonun loyihasida ko‘zda tutilgan.
Qonun loyihasida Konstitutsiyadagi 24-modda quyidagicha tahrirda bayon etilmoqda: “Yashash huquqi har bir insonning ajralmas huquqi bo‘lib, qonun bilan muhofaza qilinadi. Inson hayotiga suiqasd qilish eng og‘ir jinoyatdir. O‘zbekiston Respublikasida o‘lim jazosi taqiqlanadi”.
Shuningdek,40-modda quyidagicha to‘ldirilmoqda:“40-1-modda. Har kim sog‘lom va qulay atrof-muhitga, uning holati haqidagi haqqoniy axborotga ega bo‘lish hamda o‘z sog‘lig‘iga yoki mol-mulkiga ekologik huquqbuzarlik tufayli yetkazilgan zararning o‘rni qoplanishi huquqiga ega”.
Bundan tashqari, 90-moddaning ikkinchi qismidagi “besh” degan so‘zni “yetti” degan so‘z bilan almashtirish taklif qilinmoqda.
O‘zgartirishdan so‘ng, mazkur moddaning ikkinchi qismi quyidagicha bo‘ladi:
“O‘zbekiston Respublikasining Prezidenti O‘zbekiston Respublikasining fuqarolari tomonidan umumiy, teng va to‘g‘ridan to‘g‘ri saylov huquqi asosida yashirin ovoz berish yo‘li bilan 7 yil muddatga saylanadi. Prezidentni saylash tartibi O‘zbekiston Respublikasining qonuni bilan belgilanadi”.
Avvalroq Oliy Majlis Senati raisining birinchi o‘rinbosari Sodiq Safoyev O‘zbekistonda yangi Konstitutsiya qabul qilingach, hamma qatori amaldagi prezident Shavkat Mirziyoyevga ham saylovlarda qatnashish imkoni yaratib berilishini ma’lum qilgandi. U “Shavkat Miromonovich Mirziyoyev qandaydir hokimiyatga tish-tirnog‘i bilan yopishib olgan siyosatchi emas”, — deya qo‘shimcha qilgandi.
O‘zbekistonda prezident vakolatlari oxirgi marta 2011-yilda o‘zgartirilgan. O‘shanda u 7 yildan 5 yilga tushirilgan edi.
Izoh (0)