“Bavariya” nima sababdan Ronaldu transferidan voz kechgani ma’lum bo‘ldi

“Bavariya” Krishtianu Ronalduni “Manchester Yunayted”dan xarid qilmaydi.

Sport1 nashrining xabariga ko‘ra, 37 yoshli futbolchi hozirgi jamoasidagi holatdan norozi va sovrinlar qo‘lga kiritishni xohlaydi. Shuning uchun portugaliyalikning vakillari haqiqatan ham Myunxen klubiga futbolchini sotib olishni taklif qilgan.

Ammo myunxenliklar rahbariyati darhol ushbu variantni rad etdi.

Qayd etilishicha, Ronalduning o‘tishi “Bavariya”dagi maoshlar tizimiga keskin ta’sir qilishi mumkin. Shuningdek, boshqaruvchilar o‘zining qiziqishlarini klubnikidan yuqori qo‘yuvchi futbolchi kerak emas, deb hisoblamoqda.

Avvalroq Ronalduning “Manchester Yunayted”dan ketishi mumkinligi va uni “Bavariya” o‘z safiga qo‘shib olishga harakat qilishi haqida xabar berilgandi. Keyinchalik myunxenliklar sport direktori Hasan Salihamijich mish-mishlar haqiqatga to‘g‘ri kelmasligini aytib o‘tgandi.

Ronaldu APLning 2021/22-yilgi mavsumi doirasida 30 o‘yinda 18 ta golga mualliflik qildi.