“Asosiy sovg‘a 600 ming so‘mlik vaucher edi”. Qoraqalpog‘istonda “Pilot”ga munosib ko‘rilgan IT tanlovi g‘olibi tanlovning asosiy sovg‘asi boshqa ekanini aytmoqda (video)

Biroz avval Qoraqalpog‘iston Respublikasining Chimboy tumanida IT tanlovi g‘olibiga “Pilot” (udlinitel, tok uzaytgich) sovg‘a qilingani va bu kulgiga olingani haqida xabar berilgandi. “Daryo” muxbiri Chimboy tumanida bo‘lib, holatning qo‘shimcha tafsilotlarini o‘rgandi.

Surishtiruv avvalida tanlovni tashkil qilgan rasmiylardan izoh olindi. IT parkning Chimboy tumani bo‘limi menejeri Atabek Kalmuratov “Daryo” jurnalistiga voqea tafsilotlarini ochiqladi.

Uning aytishicha, tarmoqlarda mashhur bo‘lgan “Pilot” sovg‘asi tanlovning asosiy sovg‘asi emas. Tanlov esa eng quyi bosqichda o‘tkazilgan.

“Mazkur tanlov 2022-yilning 18-iyun kuni bo‘lib o‘tgandi. Tanlovda 60 dan ortiq maktab o‘quvchisi qatnashdi. Va to‘rtta o‘rin aniqlandi. Birinchi o‘rin egasiga to‘qqiz oylik o‘qish uchun 1 million 800 ming so‘mlik vaucher sertifikati berilgan bo‘lsa, ikkinchi o‘ringa 1 million 200 ming so‘mlik va ikkita uchinchi o‘rin uchun 600 ming so‘mdan 1 million 200 ming so‘mlik vaucherlar berildi. Asosiy sovg‘a shu edi”, — deydi Atabek Kalmuratov.

Chimboydagi 15—25 yoshli 60 nafardan ziyod yoshlar orasida chindan ham Maqsim Jumabayev, Miyribek Aytmuratov, Damir Askerbayev, Qalmuratov Azamatlar g‘olib va sovrindorlar qatorida taqdirlangan.

Tanlovda “Pilot” olganlar ikki nafar bo‘lgan.

Damir Askerbayev va Azamat Qalmuratovlar “IT bilimdoni” tanlovining tuman bosqichida 3-o‘rinni egallagan. Ijtimoiy tarmoqlarda mashhur bo‘lgan yigitning ismi esa Azamat Qalmuratov. U tumandagi 39-maktabda o‘qiydi. Azamat biz bilan suhbatda barchasi qanday bo‘lgani, o‘ziga berilgan o‘sha “mashhur sovg‘a” haqida gapirib berdi.

“‘Pilot’ menga berilgan sovg‘aning qo‘shimchasi edi. Menga uchinchi o‘rin uchun 600 ming so‘mlik vaucher sertifikati berilgandi. Shaxsan men uchun bu sovg‘a ayni muddao bo‘ldi”, — deydi Azamat Qalmuratov.

Eslatib o‘tamiz, avvalroq Alisher Sa’dullayev mazkur holatga e’tibor qaratib, tanlovning tuman bosqichida uchinchi o‘rinni qo‘lga kiritgan ikki nafar bolaga Yoshlar ishlari agentligi, Chimboy tumani hokimligi va boshqa mutasaddi tashkilotlar tomonidan bittadan komyuter sovg‘a qilinganini aytgani xabar berilgandi.