Tashqi ishlar vaziri o‘rinbosari Furqat Siddiqov 23-iyun kuni Turkmanistonning O‘zbekistondagi favqulodda va muxtor elchisi Yozquli Mammedov bilan uchrashdi. Bu haqda TIV axborot xizmati xabar qildi.
Qayd etilishicha, uchrashuvda O‘zbekiston—Turkmaniston yaxshi qo‘shnichilik va strategik sheriklik munosabatlarini rivojlantirish, shuningdek, oliy va yuqori darajadagi bo‘lajak tadbirlarga tayyorgarlikka doir dolzarb masalalar muhokama qilingan. Mammedov O‘zbekiston tomoniga elchixona faoliyatini barcha yo‘nalishlarida qo‘llab-quvvatlayotgani, jumladan, Turkmanistonga turli darajadagi tashriflarni tashkil etish borasida doimiy yordam uchun minnatdorlik bildirgan.
Tomonlar o‘zaro manfaatli hamkorlikni kengaytirish, savdo-iqtisodiy, transport-tranzit, gumanitar va boshqa sohalarda istiqbolli loyiha va dasturlarni birgalikda amalga oshirish muhimligini ta’kidlagan.
Mintaqaviy va xalqaro xavfsizlikning dolzarb masalalari yuzasidan fikr almashilgan.
Bundan tashqari, shu kuni Furqat Siddiqov Qirg‘izistonning mamlakatdagi favqulodda va muxtor elchisi Musa Jamanbayev bilan ham uchrashuv o‘tkazgan. Unda ikki tomonlama hamkorlikni rivojlantirish hamda bo‘lajak oliy va yuqori darajadagi tadbirlarga tayyorgarlik ko‘rish masalalari muhokama qilingan.
Tomonlar ikki mamlakat prezidentlarining shaxsiy aloqalari tufayli O‘zbekiston—Qirg‘iziston munosabatlari sifat jihatidan yangi bosqichga ko‘tarilganini ta’kidlagan.
Savdo, sanoat kooperatsiyasi, qishloq xo‘jaligi va madaniyat sohalaridagi ikki tomonlama munosabatlarni jadallashtirish masalalariga e’tibor qaratilgan. Shuningdek, mintaqaviy va xalqaro ahamiyatga molik dolzarb masalalar yuzasidan ham fikr almashilgan.
Izoh (0)