Neymar “PSJ”ni tark etishi mumkin.
Foot Mercato nashrining xabariga ko‘ra, “PSJ”ning qatarlik xo‘jayinlari va klubning yangi maslahatchisi Luis Kampos braziliyalik hujumchiga ishonch bildirmayapti.
“PSJ” allaqachon Neymarning narxini belgilab qo‘ygan, ammo hozircha uni oshkor etmayapti. 30 yoshli futbolchi kimnidir qiziqtiradimi yoki yo‘qmi, bu ham noma’lum. U oladigan yiliga 30 million yevrolik maosh potensial xaridorlarni qo‘rqitishi mumkin.
1-iyul kuni hujumchining “PSJ” bilan shartnomasi avtomatik ravishda 2027-yilga qadar uzaytiriladi. Uning shartnomasida shunday band mavjud. 2021-yilda parijliklar Neymar bilan 2025-yilga qadar shartnomani uzaytirgandan so‘ng, o‘sha yilning o‘zida 1-iyul kuni shartnomasi avtomatik tarzda 2026-yilga qadar uzaygan. 2022-yil 1-iyulda esa 2027-yilgacha uzayadi.
“Neymar ‘PSJ’ loyihasiga qiziqib qolgan va unga o‘z hissasini qo‘shmoqchi. U ketishni xohlamaydi”, — deydi futbolchining yaqinlaridan biri.
Avvalroq, “PSJ” “Barselona”ga Neymarni sotib olishni taklif qilgani xabar qilingandi.
Neymar 2017-yildan buyon parijliklar sharafini himoya qilib keladi. “PSJ” hujumchi uchun “Barselona”ga 222 million yevro to‘lab bergan edi. Braziliyalikning amaldagi shartnomasi 2025-yilda o‘z nihoyasiga yetadi.
Braziliyalik 2021/22-yilgi mavsum “PSJ” safida barcha musobaqalarda 28 ta o‘yinda ishtirok etib, 13 ta gol va 8 ta golli uzatmaga mualliflik qildi.
Izoh (0)