“Kamp Nou”da ta’mirlash ishlari boshlanadi. “Barselona” 2023/24-yilgi mavsum o‘yinlarini boshqa stadionda o‘tkazadi

“Barselona” 2023/24-yilgi mavsum uy o‘yinlarini “Kamp Nou” stadionida o‘tkazmaydi.

Kataloniya klubi stadionida yozdayoq qayta qurilish ishlari boshlanadi, lekin shunga qaramasdan, jamoa 2022/23-yilgi mavsumni ham “Kamp Nou”da o‘tkazadi. 2023/24-yilgi mavsumda esa uy o‘yinlarini Lyuis Kompanis nomidagi “Olimpiya” stadionida o‘tkazadi.

Bu haqida “ko‘k-anorranglilar”ning prezidenti Xoan Laporta matbuot anjumanida ma’lum qildi.

Majburiy ko‘chish tufayli “Barselona” o‘yinlariga borishi mumkin bo‘lgan muxlislar soni deyarli ikki baravar kamayadi. “Kamp Nou” stadioni 98 ming tomoshabinni sig‘dira olsa, “Olimpiya” o‘yingohining sig‘imi 55 mingni tashkil etadi.

Ayni vaqtda “Barselona” “Olimpiya” stadionining ayrim joylarida ta’mirlash ishlarini olib bormoqda.