Неймар «ПСЖ»ни тарк этиши мумкин.
Foot Меrcаtо нашрининг хабарига кўра, «ПСЖ»нинг қатарлик хўжайинлари ва клубнинг янги маслаҳатчиси Луис Кампос бразилиялик ҳужумчига ишонч билдирмаяпти.
«ПСЖ» аллақачон Неймарнинг нархини белгилаб қўйган, аммо ҳозирча уни ошкор этмаяпти. 30 ёшли футболчи кимнидир қизиқтирадими ёки йўқми, бу ҳам номаълум. У оладиган йилига 30 миллион евролик маош потенциал харидорларни қўрқитиши мумкин.
1 июль куни ҳужумчининг «ПСЖ» билан шартномаси автоматик равишда 2027 йилга қадар узайтирилади. Унинг шартномасида шундай банд мавжуд. 2021 йилда парижликлар Неймар билан 2025 йилга қадар шартномани узайтиргандан сўнг, ўша йилнинг ўзида 1 июль куни шартномаси автоматик тарзда 2026 йилга қадар узайган. 2022 йил 1 июлда эса 2027 йилгача узаяди.
«Неймар ‘ПСЖ’ лойиҳасига қизиқиб қолган ва унга ўз ҳиссасини қўшмоқчи. У кетишни хоҳламайди», — дейди футболчининг яқинларидан бири.
Аввалроқ, «ПСЖ» «Барселона»га Неймарни сотиб олишни таклиф қилгани хабар қилинганди.
Неймар 2017 йилдан буён парижликлар шарафини ҳимоя қилиб келади. «ПСЖ» ҳужумчи учун «Барселона»га 222 миллион евро тўлаб берган эди. Бразилияликнинг амалдаги шартномаси 2025 йилда ўз ниҳоясига етади.
Бразилиялик 2021/22 йилги мавсум «ПСЖ» сафида барча мусобақаларда 28 та ўйинда иштирок этиб, 13 та гол ва 8 та голли узатмага муаллифлик қилди.
Изоҳ (0)