Andijon viloyatidagi “Do‘stlik” chegara bojxona posti xodimlari 113 ming dollarning noqonuniy olib chiqish uchun sodir etilgan nayrangni fosh qildi. Bu haqda viloyat Bojxona boshqarmasi matbuot xizmati xabar berdi.
“Do‘stlik” chegara bojxona postiga chiqish piyoda yo‘lagi orqali Qirg‘izistonga o‘tib ketish maqsadida kirib kelgan fuqaro Z.Y. bojxonachilar og‘zaki so‘rovida valyuta boyliklari yo‘qligini ma’lum qilgan. Shundan so‘ns, ushbu shaxsga tegishli bo‘lgan siyohrang polietilen paket xolislar ishtirokida ko‘zdan kechirilganida, nonlar orasiga qora rangli polietilen paketga o‘rab qo‘yilgan 73,8 ming dollari borligi ma’lum bo‘lgan.
Shundan so‘ng fuqaro Z.Y. xolislar ishtirokida bojxona shaxsiy ko‘rigidan o‘tkazilganida, uning yonidan kiyimlari orasida yashirilgan yana 40 ming dollari mavjud ekanligi aniqlangan.
Natijada, deklaratsiyada ko‘rsatilmagan va bojxonachilar og‘zaki so‘rovida ma’lum qilinmagan jami 113,8 ming dollarini respublika hududidan noqonuniy tarzda olib chiqilishi oldi olingan.
Hozirda mazkur holat yuzasidan Andijon viloyati bojxona boshqarmasi tomonidan tergovga qadar tekshiruv harakatlari davom ettirilmoqda.
Ma’lumot uchun, qonunchilikka ko‘ra 100 million so‘mgacha ekvivalentdagi naqd xorijiy valyutani O‘zbekiston hech qanday ruxsatnomasiz olib chiqish mumkin. Shuningdek, 70 million so‘mgacha bo‘lgan ekvivalentdagi mablag‘lar uchun deklaratsiya talab qilinmaydi. Avvalroq Toshkent xalqaro aeroportida 286 ming dollardan ortiq pulni norin, kabob, paxlava kabi yeguliklar orasiga yashirib, bojxonadan olib o‘tilishining oldi olingani haqida xabar berilgan edi. Mavzuga doir:
Izoh (0)