Kelasi 5 yil ichida O‘zbekistondagi 70 ming kilometrlik elektr liniyalari hamda 20 mingta transformator yangilanadi. Bu haqda bugun, 23-iyun kuni bo‘lib o‘tayotgan energetika forumida “Hududiy elektr tarmoqlari” AJ raisining birinchi o‘rinbosari Jahongir Obidjonov ma’lum qildi, deya xabar bermoqda “Daryo” muxbiri.
Jahongir Obidjonovning aytishicha, hozirda liniyalar va transformatorlarni yangilash ishlari boshlangan.
“Elektr liniyalarining asosiy qismi 60–70-yillarda qurilgan. Ularni yangilash ishlari olib borilyapti. Masalan, 2021-yilda 15 ming kilometr elektr liniyalari bilan 4 mingta transformator punktlari yangilandi. Bu yil ham liniyalarni modernizatsiya va rekonstruktura qilish ishlari davom etmoqda. Hozirda oldimizda 5 yillik reja turibdi. Unga ko‘ra, O‘zbekistonda 70 ming kilometr elektr liniyalari yangitdan qurilib, rekonstruktura qilinadi. Shu bilan birga, 20 mingta yangi transformator o‘rnatiladi. Masalan, bugungi kunda ‘Obod mahalla’ va ‘Obod qishloq’ dasturlari doirasida liniyalarni yangilash ishlari boshlangan. Yangilangan tarmoqlar birichni navbatda aholiga elektr energiyasini sifatli va barqaror yetkazib berishni ta’minlaydi. Tizimdagi avariyalar kamayadi, elektr energiyasidagi uzilishlar bartaraf etiladi”, — dedi korxona mas’uli.
Jahongir Obidjonov Toshkent shahrida bo‘lib o‘tayotgan energetika forumining ahamiyati haqida ham fikr bildirdi.
“Bu forum fikr almashish maydoni hisoblanadi. Jarayonda respublikaga yangi texnologiyalarni olib kelish bo‘yicha tajriba almashiladi. Tadbirga mehmon sifatida qo‘shni davlatlar vazirlari, xalqaro moliya institutlari konsultantlari chaqirilgan. Bu yerda bugungi dunyo tajribasidan kelib chiqib, energetika sohasini rivojlantirish uchun nima ishlar qilish kerakligi muhokama qilinadi. Biz uchun muhimi, birinchi navbatda tizimni raqamlashtirish va qayta tiklanuvchi energetikani rivojlantirishdir. Shu masalada ham, albatta, muhokamalar bo‘ladi” — dedi korxona rasmiysi.
Ma’lumot uchun, “Hududiy elektr tarmoqlari” tizimida 260 ming kilometr elektr liniyalari, 86 mingta transformator, 1 ming 700 ta podstansiya mavjud.
Izoh (0)