AQSH Xalqaro taraqqiyot agentligi (USAID) rahbari Samanta Pauerning aytishicha, Ukraina hukumati harbiy mojarolar fonida oyiga o‘rtacha 5-6 milliard dollar sarflamoqda. Pauer xonim bunday xarajatlarni “hayratlanarli” deb atadi.
“Urushga bardosh berishi kerak bo‘lgan ushbu hukumatning (Ukraina — tarh.) o‘rtacha oylik xarajatlari, so‘nggi hisob-kitoblarga ko‘ra, 5—6 milliard dollar atrofida”, — dedi AQSH vakili Jahon banki rahbari bilan suhbat chog‘ida.
10-iyun kuni AQSHning Ukrainadagi elchisi Bridjit Brink AQSHdan Ukrainaga 7,5 milliard dollarlik budjet yordami ajratilishini e’lon qilgandi. Biroq Pauer xonim bu mablag‘ yetarli emas, deb hisoblamoqda.
May oyi oxirida Ukraina Moliya vazirligi rahbari Sergey Marchenko mamlakat budjetining uchdan ikki qismi xalqaro yordamga bog‘liq ekanini aytgan. Shu bilan birga, Ukraina bosh vaziri Denis Shmixal Ukraina budjeti taqchilligi oyiga 5 milliard dollarni tashkil qilganini ta’kidlagan. Uning so‘zlariga ko‘ra, mamlakatdagi harbiy harakatlar tufayli butun iqtisodiyotning qariyb 35 foizi to‘xtab qolgan.
Birlashgan Millatlar Tashkiloti ma’lumotlariga ko‘ra, Rossiya bosqini boshlangan 24-fevraldan 20-iyungacha Ukrainada 4597 nafar tinch aholi, jumladan 313 nafari bola halok bo‘lgan. 5711 nafar tinch aholi jarohatlangan.
Donetsk va Lugansk viloyatlarining Kiyev nazorat qilayotgan hududlarida 2508 kishi halok bo‘lgan, 2430 kishi yaralangan. Viloyatlarning Kiyev nazorati ostida bo‘lmagan hududlarida esa 184 kishi halok bo‘lgan, 752 kishi jarohat olgan, deya xabar beradi BMT. Ukrainaning boshqa hududlarida 1905 kishi urush qurboni bo‘lgan, 2529 kishi yaralangan.
Izoh (0)