Germaniya va Slovakiya tomonidan so‘nggi ikki oy mobaynida rejalashtirib kelingan doiraviy yetkazib berishlar doirasida Ukrainaga og‘ir qurol-yarog‘larni taqdim etish Berlin va Bratislava o‘rtasida kelishuvlar yo‘qligi uchun kechikmoqda. Bu haqda Business Insider nashri xabar berdi.
Uning ma’lumotlariga ko‘ra, Slovakiya Kiyevga sovet ittifoqida ishlab chiqarilgan 30 ta T-72 tanklarini berib, evaziga Germaniyadan zamonaviyroq tanklar olishga rozi bo‘lgan. Ammo o‘tgan hafta Berlin unga kompensatsiya sifatida 15 ta “Leopard-2A4” tanklarini taklif qilganidan keyin, Bratislava aylanma (doiraviy, o‘zaro) yetkazib berishlardan bosh tortdi. Slovakiya hukumati fikricha, bu mamlakat mudofaasi uchun yetarli emas.
Aprel oxirida Germaniya bundestagi ko‘pchilik ovoz bilan Ukrainaga og‘ir qurol-yarog‘ yetkazib berilishini ma’qulladi. 586 ta ovoz bilan qabul qilingan deputatlar qarorida Germaniya hukumati “Ukrainaga unga zarur bo‘lgan texnikani yetkazishni davom ettirish va imkoni boricha tezlashtirish, shu bilan birga, qurol-yarog‘larning og‘ir va murakkab tizimlarini, masalan, doiraviy yetkazib berish doirasida, kengaytirish”ga chaqirilgan.
Buning uchun Germaniya Sharqiy Yevropa mamlakatlari zaxiralaridagi sovet ittifoqida ishlab chiqarilgan og‘ir texnika yetkazib berilishini kompensatsiya qilishga va’da berdi.
Ukraina hukumati G‘arb mamlakatlariga qurol-yarog‘ yetkazib berishni so‘rab bir necha marta murojaat qilgan. Aprel oxirida Ukraina prezidenti Vladimir Zelenskiy sheriklar Kiyevga o‘zi so‘ragan qurol-yarog‘larni yetkazib berishni boshlaganini ma’lum qilgan, ammo gap aynan qanday qurollar haqida borayotganiga aniqlik kiritmagan edi.
Avvalroq AQSH Mudofaa vazirligi Ukrainaga 108 ta M777 gaubitsalarini yetkazib berganini ma’lum qildi. Shuningdek, AQSH prezidenti Jo Bayden Kiyevga 1 milliard dollarlik yangi harbiy yordam paketi berilishini e’lon qildi, u yerga artilleriya qurollari va raketa tizimlari kirdi. Ukrainaga og‘ir qurol-yarog‘ yetkazib berishni aprel oxirida Germaniya va’da qilgandi, biroq hozircha birorta ham qurol yuborgani yo‘q.
Ukraina prezidenti ofisi rahbarining maslahatchisi Mixail Podolyak Rossiyaga teng kelish uchun 1 mingta 155 millimetrlik gaubitsa, 300 ta baravar o‘t ochish reaktiv tizimi, 500 ta tank va 2 mingta zirhli texnika kerakligini aytdi.
Ukrainaning Avstraliyadagi elchisi Vasiliy Miroshnichenko ta’kidlashicha, Zelenskiy diplomatlarga iloji boricha ko‘proq qurol-yarog‘, shu jumladan, gaubitsa va zirhli texnika yetkazib berilishiga erishish vazifasini yuklagan.
Rossiya TIV Ukrainaga Rossiya hududiga yetib bora oladigan qurol-yarog‘ yetkazib berilishi “keskinlashuv sari katta qadam” bo‘lishidan ogohlantirgan. Rossiyaning Vashingtondagi elchisi Anatoliy Antonov, o‘z navbatida, Qo‘shma Shtatlardan Ukrainani qurol-yarog‘ bilan ta’minlashni bas qilishni talab qilgan.
Zelenskiy esa Rossiya hududiga hujum qilish ehtimolini rad etdi. Ukraina uzoq masofaga mo‘ljallangan qurollarni Rossiyadagi nishonlarga hujum qilish maqsadida emas, balki o‘z mudofaasi uchun so‘ramoqda, dedi u.
Izoh (0)