Rossiya prezidentining matbuot kotibi Dmitriy Peskov Janubiy Osetiya hukumati referendum o‘tkazish qaroridan keyin yuzaga kelgan yuridik chigallikni bartaraf etishi zarur, deb hisoblaydi. Taklif etilgan variantda respublika aholisi Rossiya Federatsiyasi bilan birlashishni qo‘llab-quvvatlashi yoki rad etishi kerak edi. Kreml vakili so‘zlariga ko‘ra, Rossiya “kim bilandir birlasha” olmaydi. Uning ta’kidlashicha, Rossiya tomoni avval ham Janubiy Osetiya hukumatiga bu chigallik haqida aytgan.
“Rossiya kim bilandir birlasha olmaydi-ku. Agar kim bilandir birlashsa, butunlay yangi entitet (tuzilma) yuzaga keladi. Yuridik chigallik paydo bo‘ladi. U yerdagi hamkasblarimizning o‘zlari aniqlashtirib, hal qilgani yaxshi”, — dedi Peskov jurnalistlarning Janubiy Osetiya prezidenti bayonotini izohlash haqidagi so‘roviga javoban.
Avvalroq Janubiy Osetiya prezidenti ma’muriyati Rossiyaga qo‘shilish haqidagi, sobiq prezident Anatoliy Bibilov va amaldagi davlat rahbari Alab Gagloyev tomonidan imzolangan referendum haqidagi farmon Moskva bilan kelishilmaganini ma’lum qilgandi. Referendumni iyulda o‘tkazish rejalashtirilgandi. Prezident ma’muriyatidagilar Rossiya prezidenti apparatidagi hamkasblari bilan suhbatdan keyin hujjat Rossiya-Osetiya hamkorligi to‘g‘risidagi shartnoma bandlariga zid, degan xulosaga kelgan. Referendum o‘tkazilib, Rossiya tarkibiga kirgan taqdirda, Janubiy Osetiya Shimoliy Osetiya bilan federatsiyaning bitta subyekti sifatida birlashishni rejalashtirgandi.
Janubiy Osetiya prezidenti Anatoliy Bibilov hududning Rossiyaga qo‘shilishi haqidagi rejalar haqida 30-mart kuni e’lon qilgandi. U Shimoliy Osetiya bilan bir hududga birlashish taklifini bergan. Aprelda Janubiy Osetiyada prezidentlik saylovlari o‘tkazilgan va 56,09 foiz olgan Alan Gagloyev g‘alabaga erishgan. Gagloyev Rossiyaga qo‘shilish bo‘yicha referendumni kechiktirish haqida gapirgan. Biroq Bibilov umumxalq muhokamasini 17-iyulga ko‘chirishga qaror qildi. Kreml may oyi oxirida referendumni tashkillashtirishda ishtirok etmayotganini ma’lum qilib, undagi savollarni qanday tuzish haqida o‘ylab ko‘rishni taklif etgandi. May oxirida Gagloyev 2022-yil 17-iyul kuni Rossiya bilan birlashish haqida referendum o‘tkazilishini ko‘zda tutuvchi farmon amal qilishini Rossiya bilan barcha maslahatlashuvlar yakunlanguniga qadar to‘xtatib qo‘ydi.
Izoh (0)