Буюк Британия Ички ишлар вазирлиги тайёрлаётган тажрибавий лойиҳа доирасида GPS (Global Positioning System — глобал жойлашувни аниқлаш тизими) қурилмаси орқали муҳожирларнинг жойлашган жойини кузатиб бориш режалаштирилмоқда, деб хабар беради Anadolu Agency.
Британия ИИВга кўра, тажрибавий дастур доирасида кузатув қурилмаси воситасида муҳожирлар билан мунтазам контакт ушлаб турилади, шунингдек, миграция марказлари режимини бузган шахслар бўйича маълумот йиғиш амалга оширилади.
Янги механизм қоидаларга риоя қилинмаган тақдирда, муҳожирларнинг кўчага чиқишини ёки маълум бир жойларга ташриф буюришини тақиқлашни, шунингдек, қўлга олиниши ёки суд томонидан таъқиб қилинишини кўзда тутади.
Тажрибавий лойиҳа иштирокчилари сони ошкор этилганича йўқ.
Нашр қайд этишича, Буюк Британия бош вазири Борис Жонсон синов лойиҳасини ёқлаб чиқиб, механизмнинг мамлакатга кириб келаётган муҳожирларни назорат қилиш соҳасидаги аҳамиятини таъкидлади.
Бош вазир фикрича, Буюк Британия меҳмондўст мамлакат ҳисобланади. «Мен бу билан фахрланаман, бироқ қонунларни бузиб, мамлакатимизга ноқонуний йўл билан кираётганларни айтиб ўтиш зарур. Бу бизнинг Руанда масаласидаги ҳам сиёсатимиздир», — деди Жонсон.
Бу орада Британиянинг Қочқинлар масалалари бўйича кенгаши ижрочи директори Энвер Соломон ҳукуматнинг янги ташаббусини танқид қилди.
«Британия ҳукумати урушдан, қирғиндан ва таъқиблардан қочиб келган одамларга жиноятчи каби муносабатда бўлаётгани даҳшатли ҳолатдир», — деди Соломон.
Изоҳ (0)