Erling Holand “Real” uni o‘z safiga qo‘shib olishni istagan bo‘lsa-da, “Manchester Siti”ga o‘tishni xohlagan.
Madrid klubi norvegiyalik hujumchi bilan muzokara olib borgan. “Qaymoqranglilar” Holandni ko‘ndirish uchun bir nechta uchrashuv tashkil qilgan.
“Real” 21 yoshli hujumchini rad etmagan, Erlingning o‘zi “Manchester Siti”ga o‘tishni ma’qul ko‘rgan, deb yozadi jurnalist Fabrisio Romano.
Holandning La Liga jamoasiga o‘tishi kelajakda amalga oshishi mumkin, ammo “Real” ikki yildan keyin norvegiyalik shartnomasida ko‘rsatilgan tovon pulini to‘lab sotib olishi haqida avvalroq yangragan xabarlar noto‘g‘ri.
“Manchester Siti” hujumchiga hozir va kelajakda ham ishonch bildirmoqchi, shu bois uni transferga qo‘yish haqida gap-so‘z bo‘lishi mumkin emas.
Avvalroq “qirollik klubi” prezidenti Florentino Peres klub Erling bilan shartnoma imzolashni xohlamaganini aytgandi: “‘Real’da dunyoning eng yaxshi hujumchisi o‘ynaydi. Holandni zaxirada o‘tirishi uchun sotib olishimiz kerakmidi?”.
Erling Holand “Manchester Siti” bilan 2027-yilning yoziga qadar mo‘ljallangan shartnoma imzoladi. Unga qadar “Borussiya” sharafini himoya qilgan hujumchi, dortmundliklar safida 89 ta o‘yin o‘tkazib, 86 gol va 23 ta golli uzatmaga mualliflik qilgan.
Izoh (0)