Ukraina Qrimni harbiy yo‘l bilan qaytarib olishi ma’lum qilindi

Ukraina prezidenti Vladimir Zelenskiyning vakili Tamila Tasheva 24-fevraldan keyin Kiyevning Qrimni qaytarib olishga yondashuvlari o‘zgarganini, endi bunga harbiy yo‘l bilan erishishga harakat qilishini aytdi, deb yozadi “RIA Novosti”.

2021-yil martidan buyon Kiyevning “Qrimni deokkupatsiya qilish” (istilodan ozod qilish) bo‘yicha strategiyasida asosiy vosita muzokaralar jarayoni deb aytilayotgandi. Shu bilan birga, turli manbalar ma’lumotlari hamda 2022-yil fevralida boshlangan Rossiya maxsus operatsiyasi chog‘ida aniqlangan dalillar Ukraina Qrim va Donbassga nisbatan agressiyaga tayyorlanganini ko‘rsatdi. Rossiya prezidenti Vladimir Putin aprelda maxsus harbiy operatsiya mamlakatga xavf solib turgan real xatar oldini olganini aytgandi.

“24-fevraldan keyin Qrim masalasi, hududlarni qaytarib olishga yondashuvlar o‘zgardi. Hozir biz birinchi navbatda Ukraina qurolli kuchlariga umid qilyapmiz”, — dedi Tasheva “Ukraina 24” telekanali efirida. Uning qo‘shimcha qilishicha, Qrimni qaytarib olish bo‘yicha har qanday rejalarni amalga oshirishda uning hududiga birinchi bo‘lib ukrainalik harbiylar kiradi.

Zelenskiyning vakili ta’kidlashicha, Ukraina yarim orolni qaytarib olgan taqdirda, Rossiyaga qo‘shilganidan keyin uning hududiga ko‘chib o‘tgan rossiyaliklar chiqarib yuboriladi. Uning so‘zlariga ko‘ra, Kiyevning asosiy pozitsiyasi — “o‘z hududlarimizni hech qanday ultimatumlarsiz qaytarib olish” va 1991-yilgi chegaralarga qaytishdan iborat. Shuningdek, Tasheva ba’zi davlatlar yetakchilari Ukraina hukumatini bu masalada murosalarga borishga undayotganini, ammo Kiyev bunga rozi bo‘lmasligini aytdi.

Donbass respublikalaridan tinch aholini evakuatsiya qilish ishlari vaziyat keskinlashuvi fonida fevral o‘rtalarida boshlangan edi. Shundan keyin Rossiya DXR va LXR mustaqilligini tan oldi, 24-fevralda esa Ukrainada “demilitarizatsiya va denatsifikatsiya” (qurolsizlantirish va natsizmni yo‘q qilish) bo‘yicha maxsus harbiy operatsiya boshladi.

Rossiya harbiylari Ukrainaning Xerson viloyatini hamda Zaporojye viloyatining bir qismini bosib olganini ma’lum qildi. Hududlarda harbiy-fuqarolik ma’muriyatlari tuzildi, Rossiya telekanallari va radiostansiyalari uzatila boshladi, Qrim bilan savdo aloqalarini tiklash ishlari olib borilmoqda. Bosib olingan hududlar Rossiya Federatsiyasiga qo‘shilish rejalari haqida e’lon qildi.