Boris Jonson urush boshlanganidan beri ikkinchi marta Kiyevga keldi. Uning tashrifi haqida yana oldindan e’lon qilinmadi

Buyuk Britaniya bosh vaziri Boris Jonson Ukrainaga tashrif bilan keldi. Bu haqda Sky News hamda HuffPost UK nashrlari xabar bergan.

Ukraina prezidenti Vladimir Zelenskiy Britaniya hukumati rahbari bilan Kiyevdagi uchrashuv tafsilotlari aks etgan videolar va fotosuratlarni e’lon qilgan.

Ukraina prezidenti ofisi rahbari Andrey Yermak Zelenskiy va Jonson Ukrainaga qurol-yarog‘ yetkazib berish hamda iqtisodiy yordam ko‘rsatish, shuningdek Rossiyaga qarshi sanksiyalarni kuchaytirish masalalarini muhokama qilganini bildirgan.

Bu Rossiya Ukrainada urush boshlaganidan keyin Jonsonnning Kiyevga ikkinchi tashrifi. Kiyevga birinchi safarni u 9-aprelda o‘tkazgandi. Jonsonning Ukrainaga birinchi tashrifi ham ikkinchisi ham oldindan e’lon qilinmagan.

16-iyunda Kiyevga Italiya bosh vaziri Mario Dragi, Fransiya prezidenti Emmanuel Makron va Germaniya kansleri Olaf Shols kelgandi. Ular Ukrainaga Yevroittifoq a’zoligi maqomini zudlik bilan berilishii qo‘llab-quvvatlashlari haqida bayonot bergan.

17-iyunda Yevrokomissiya ham Ukrainaga nomzodlik maqomini berishni tavsiya qilgan. Moldova ham shunday nomzod maqomligiga tavsiya olgan. Yevrokomissiya Gruziyaga YI a’zoligi maqomini berishni rad etgan.

Ukraina hamda Moldovaga YI a’zoligiga nomzodlik maqomini berish haqidagi qaror Yevroittifoqning Bryusselda 23 – 24-iyunda bo‘lib o‘tadigan sammitida muhokama qilinadi.