O‘zbekistonda yangi o‘quv yilida 700 mingdan ortiq bola 1-sinfga o‘qishga qabul qilinadi

AOKAda o‘tkazilgan brifingda Xalq ta’lim vazirligi axborot xizmati rahbari Laylo Rustamova 2022—2023-o‘quv yilida 1-sinfga qabul jarayonlarini tashkil etish tartibi haqida ma’lumot berdi.

Qayd etilishicha, 1-sinfga qabul ikki bosqichda (mikrohudud va mikrohududdan tashqari qo‘shimcha qabul) amalga oshiriladi. Birinchi bosqich joriy yilning 20-iyunidan boshlanib 31-iyulga qadar mahalliy hokimlik qarorlari bilan maktablarga biriktirilgan mikrohudud bo‘yicha amalga oshiriladi. Ikkinchi bosqich 1—15-avgust kunlari mikrohududdan tashqari qo‘shimcha qabul jarayonlari umumta’lim maktablarining o‘quvchi o‘rni, malakali pedagog kadrlar bilan ta’minlangani, sinf xonalarining yetarli ekanini inobatga olgan holda amalga oshiriladi.

Toshkent shahri, Qoraqalpog‘iston Respublikasi va viloyat markazlarida elektron shaklda, tumanlarda (shahar) an’anaviy shaklda hujjatlar qabul qilinadi. Chet el fuqarolarining farzandlari hududiy boshqarmalar orqali belgilangan tartibda umumta’lim maktablariga qabul qilinadi.

Nodavlat ta’lim muassasalariga qabul jarayonlari o‘zlari tomonidan belgilangan tartibda amalga oshiriladi.

Barcha hududiy boshqarmalar va tuman (shahar) xalq ta’limi bo‘limlariga qabul jarayonlarini muvofiqlashtirish bo‘yicha shtablar tashkil etiladi.

Ta’kidlanishicha, bola maktabga 7️ yoshga to‘ladigan yilda qabul qilinadi. Ya’ni, bu yil 1-sinflarga 2015-yilning 1-yanvaridan 31-dekabriga qadar tug‘ilgan bolalar olinadi. Talab barcha ta’lim muassasalariga, jumladan, nodavlat ta’lim muassasalariga ham taalluqli bo‘ladi.

Olti yoshdan yetti yoshgacha bo‘lgan bolalarni boshlang‘ich ta’limga bir yillik majburiy tayyorlash Maktabgacha ta’lim vazirligi tomonidan amalga oshiriladi.