Tashqi ishlar vaziri vazifasini bajaruvchi Vladimir Norov 17-iyun kuni Fransiyaning O‘zbekistondagi favqulodda va muxtor elchisi Oreliya Bushezni qabul qildi. Bu haqda TIV axborot xizmati xabar qildi.
Qayd etilishicha, uchrashuvda O‘zbekiston—Fransiya kun tartibining turli jihatlari muhokama qilingan. Muloqot chog‘ida ko‘p tomonlama tuzilmalar, xususan, rasmiy Parijning Yevropa Ittifoqi kengashidagi raisligini hisobga olgan holda o‘zaro hamkorlikka alohida e’tibor qaratilgan.
Turli daraja va shakllarda rejalashtirilgan muloqotlar jadvali bo‘yicha takliflar ko‘rib chiqilgan.
Ta’kidlanishicha, Fransiyaning “Medef Internatsional” ishbilarmonlar doirasi assotsiatsiyasi O‘zbekistonga tashrif buyuradi. Bu savdo-iqtisodiy aloqalarni faollashtirish hamda mamlakatda Fransiya kapitali ishtirokidagi istiqbolli investitsiyaviy loyihalarni amalga oshirishga xizmat qiladi.
Tomonlar 2022-yil noyabr oyida Parijdagi Arab dunyosi institutida va Luvr muzeyida “Markaziy Osiyoning ulug‘vorligi. O‘zbekiston karvon yo‘llarida” hamda “Yaktak va chopon” nomli o‘rgazmalar o‘tkazilishi rejalashtirilayotganini inobatga olgan holda madaniy-gumanitar hamkorlikni kengaytirish borasida o‘zaro qiziqish bildirgan.
Shuningdek, ayrim xalqaro va mintaqaviy mavzular yuzasidan fikr almashilgan.
Avvalroq Vladimir Norov Pokiston va Ummonning O‘zbekistondagi elchilari bilan uchrashgani, Vyetnamning O‘zbekistondagi yangi elchisidan ishonch yorliqlarini qabul qilgani haqida xabar berilgan.
Izoh (0)