Toshkent va Buxoro viloyatlarida o‘qishga kiritish bilan bog‘liq firibgarlik holatlari aniqlandi, deb xabar beradi Bosh prokuratura huzuridagi departament.

Ma’lum qilinishicha, departamentning Chirchiq shahar bo‘limi tomonidan Toshkent viloyati DXX va IIB xodimlari bilan hamkorlikda tezkor tadbir o‘tkazilgan. Tadbirda M.A. ismli shaxs yuqori lavozimda ishlovchi tanishlari orqali fuqaro M.ni O‘zbekiston davlat jismoniy tarbiya va sport universitetiga bakalavr yo‘nalishiga o‘qishga kiritib qo‘yish evaziga 5 ming dollar olgan vaqtida ashyoviy dalillar bilan ushlangan.

Shuningdek, departamentning Buxoro viloyat boshqarmasi tomonidan o‘tkazilgan tergovga qadar tekshiruvda, Buxoro davlat universiteti talabasi Yu.Sh. fuqaro B.ning qo‘shni Qozog‘iston universitetidagi o‘qishini o‘zi ta’lim olayotgan universitetning jismoniy tarbiya fakultetiga ko‘chirtirib berish evaziga 22 million so‘mni firibgarlik yo‘li bilan qo‘lga kiritgani aniqlangan. Tekshiruv davomida u o‘z aybiga iqror bo‘lib qaytargan 5 million so‘mi ashyoviy dalil sifatida olingan.

Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora olish) bilan jinoyat ishlari qo‘zg‘atilib, tergov harakatlari o‘tkazilmoqda.

Avvalroq Qashqadaryoda ikki kishini o‘qishga kiritib qo‘yish uchun 10 ming dollar pora olgan shaxs qo‘lga tushgani, Farg‘onada Toshkent tibbiyot akademiyasiga o‘qishga kiritib qo‘yish uchun 10 ming dollar olgan shaxs ushlangani to‘g‘risida xabar berilgandi.