АОКАда ўтказилган брифингда Халқ таълим вазирлиги ахборот хизмати раҳбари Лайло Рустамова 2022—2023-ўқув йилида 1-синфга қабул жараёнларини ташкил этиш тартиби ҳақида маълумот берди.
Қайд этилишича, 1-синфга қабул икки босқичда (микроҳудуд ва микроҳудуддан ташқари қўшимча қабул) амалга оширилади. Биринчи босқич жорий йилнинг 20 июнидан бошланиб 31 июлга қадар маҳаллий ҳокимлик қарорлари билан мактабларга бириктирилган микроҳудуд бўйича амалга оширилади. Иккинчи босқич 1—15 август кунлари микроҳудуддан ташқари қўшимча қабул жараёнлари умумтаълим мактабларининг ўқувчи ўрни, малакали педагог кадрлар билан таъминлангани, синф хоналарининг етарли эканини инобатга олган ҳолда амалга оширилади.
Тошкент шаҳри, Қорақалпоғистон Республикаси ва вилоят марказларида электрон шаклда, туманларда (шаҳар) анъанавий шаклда ҳужжатлар қабул қилинади. Чет эл фуқароларининг фарзандлари ҳудудий бошқармалар орқали белгиланган тартибда умумтаълим мактабларига қабул қилинади.
Нодавлат таълим муассасаларига қабул жараёнлари ўзлари томонидан белгиланган тартибда амалга оширилади.
Барча ҳудудий бошқармалар ва туман (шаҳар) халқ таълими бўлимларига қабул жараёнларини мувофиқлаштириш бўйича штаблар ташкил этилади.
Таъкидланишича, бола мактабга 7️ ёшга тўладиган йилда қабул қилинади. Яъни, бу йил 1-синфларга 2015 йилнинг 1 январидан 31 декабрига қадар туғилган болалар олинади. Талаб барча таълим муассасаларига, жумладан, нодавлат таълим муассасаларига ҳам тааллуқли бўлади.
Олти ёшдан етти ёшгача бўлган болаларни бошланғич таълимга бир йиллик мажбурий тайёрлаш Мактабгача таълим вазирлиги томонидан амалга оширилади.
Мавзуга доир:
- Ўзбекистондаги мактабларда 1-синфга қабул қачондан бошланиши маълум қилинди
- Ўзбекистонда болаларни 1-синфга қабул қилиш бўйича давлат хизматини кўрсатиш тартиби белгиланди
- Ўзбекистонда Президент мактабларига кира олмаган 5-синф ўқувчилари янги ташкил этилаётган ихтисослаштирилган мактабларга имтиҳонсиз қабул қилинади
Изоҳ (0)