O‘FA media departamenti rahbari Davron Fayziyev U-23 Osiyo Kubogi finali doirasidagi O‘zbekiston U-23 va Saudiya Arabistoni U-23 o‘yini chiptalari bo‘yicha rasmiy izoh berdi.
Fayziyev 17-iyun kuni tungi 22:59 da qilgan videomurojaatida iTicket.uz onlayn platformasi tomonidan va “Bunyodkor” stadioni kassalarida chiptalar sotuvi boshlangani, biroq stadion atrofida chayqovchilar tufayli tartibsizliklar yuzaga kelganini ma’lum qildi. Shuningdek, iTicket.uz kompaniyasi saytga tashrif buyuruvchilar ko‘pligi sabab platformada texnik nosozlik yuzaga kelgani va yaqin vaqt ichida bu muammo bartaraf etilishi aytilgan. Kassalardagi uzun navbatlar saytdagi nosozlik bilan bog‘landi. Videoda iTicket.uz sayti ma’lumotlariga ko‘ra 17-iyun kuni 10 mingta chipta sotilgani qo‘shimcha qilingan.
“Championat.asia” saytining yozishicha, iTicket.uz yarim tunda, soat 2:30 larda onlayn sotuvni boshlagan, tungi 3:52 da esa biletlar sotib bo‘lingan. 18-iyun soat 12:00 holatiga ko‘ra ham platformada chipta yo‘qligini ko‘rish mumkin.
Eslatib o‘tamiz, 17-kuni “Daryo” muxbiri final o‘yiniga chipta xarid qilish uchun minglab muxlislar “Bunyodkor” stadioni atrofida to‘plangani haqida xabar bergandi. Chiptaxona oldida uzun navbatlar yuzaga kelgandi. Chiptaxona juda katta tanaffuslar bilan oz miqdordagi chiptalarni sotgan. Muxlislar yopiq chiptaxonaga navbatda turgan vaqtda chayqovchilar hech qanday taqiqsiz oldi-sotdi bilan shug‘ullandi. Kassada 25 ming so‘m bo‘lgan chiptalar “qo‘lda” 100—150 mingdan sotildi. Markaziy sektorlar uchun belgilangan chiptalar esa 400—500 ming so‘mdan sotildi.
19:00 larga yaqin chiptaxona yopilgani ma’lum qilindi va tartibsizlik kuchayib ketdi. Shundan so‘ng Milliy gvardiya xodimlari chiptaxona atrofini muxlislardan “tozaladi”. Milliy gvardiya xodimlari buning uchun ko‘zdan yosh oqizuvchi gazdan foydalangani aytilgandi. Biroq Milliy gvardiya bunday ma’lumotlarni inkor etdi va “stadioni kassalari oldida tartibni saqlash uchun hech qanday kuch ishlatish yoki maxsus vositalardan foydalanilmaganini” ma’lum qildi.
18-iyun kuni ham minglab odamlar “Bunyodkor” stadioni atrofida chipta uchun navbatda turibdi. Narxlar tobora ko‘tarilib borayotgani aytilmoqda.
Izoh (0)