Krishtianu Ronaldu “Manchester Yunayted”dan ketishi mumkin.
La Repubblica nashrining xabariga ko‘ra, portugaliyalik hujumchi jamoa yangi mubbiyi Erik ten Hagning uslubiga mos kelmaydi.
“Manchester Yunayted” keyingi mavsum Chempionlar Ligasida ishtirok etmasligini inobatga olgan futbolchining agenti Jorje Mendesh mijozi uchun yangi jamoa izlash bilan band.
37 yoshli hujumchiga “Roma” qiziqish bildirmoqda. Joze Mourinyo bilan bir yillik hamkorlikdan so‘ng rimliklar Ronalduning transferi “Roma” brendini rivojlantirish va uning mashhurligini oshirish uchun yordam beradi deb hisoblamoqda.
Ronaldu uchun Italiyadagi soliq rejimini muhim rol o‘ynashi mumkin, u yerdagi soliq tizimi boshqa Yevropa mamlakatlariga qaraganda yumshoqroq. Mendeshning “Roma” bilan mustahkam aloqalari mavjud, u klubga Joze Mourinyo, Ruy Patrisiu va Serjiu Oliveyrani olib kelishga yordam bergan. “Roma”ning sport direktori Tiagu Pintu ham Jorje bilan iliq munosabatlarga ega. Ular ikkalasi Pintuning “Benfika”da ishlagan davridan buyon hamkorlik qilib keladi.
Biroq Ronalduning “Roma”ga o‘tishiga to‘siqlar mavjud. Birinchidan, rimliklar unga “Manchester Yunayted” to‘laydigan 23 million yevrolik maoshni to‘lay olmaydi. Italiya klubida allaqachon moliyaviy feyr-pley borasida muammolar mavjud. Ikkinchidan, “Roma” ham mankunianliklar singari keyingi mavsum Yevropa Ligasida ishtirok etadi. Bu musobaqa Ronalduni o‘ziga jalb etishi amri-mahol.
Portugaliyalik faoliyatini davom ettirishi uchun yana bir variant mavjud — yangi mavsumda Chempionlar Ligasida ishtirok etuvchi “Sporting”. Krishtianu ushbu jamoada faoliyatini boshlagan.
Hujumchi 2021/22-yilgi mavsumda barcha musobaqalarda 39 ta o‘yinda maydonga tushib, 24 ta gol va 3 ta golli uzatmaga mualliflik qildi.
Izoh (0)