ЎФА медиа департаменти раҳбари Даврон Файзиев U-23 Осиё Кубоги финали доирасидаги Ўзбекистон U-23 ва Саудия Арабистони U-23 ўйини чипталари бўйича расмий изоҳ берди.
Файзиев 17 июнь куни тунги 22:59 да қилган видеомурожаатида iTicket.uz онлайн платформаси томонидан ва «Бунёдкор» стадиони кассаларида чипталар сотуви бошлангани, бироқ стадион атрофида чайқовчилар туфайли тартибсизликлар юзага келганини маълум қилди. Шунингдек, iTicket.uz компанияси сайтга ташриф буюрувчилар кўплиги сабаб платформада техник носозлик юзага келгани ва яқин вақт ичида бу муаммо бартараф этилиши айтилган. Кассалардаги узун навбатлар сайтдаги носозлик билан боғланди. Видеода iTicket.uz сайти маълумотларига кўра 17 июнь куни 10 мингта чипта сотилгани қўшимча қилинган.
«Championat.asia» сайтининг ёзишича, iTicket.uz ярим тунда, соат 2:30 ларда онлайн сотувни бошлаган, тунги 3:52 да эса билетлар сотиб бўлинган. 18 июнь соат 12:00 ҳолатига кўра ҳам платформада чипта йўқлигини кўриш мумкин.
Эслатиб ўтамиз, 17-куни «Дарё» мухбири финал ўйинига чипта харид қилиш учун минглаб мухлислар «Бунёдкор» стадиони атрофида тўплангани ҳақида хабар берганди. Чиптахона олдида узун навбатлар юзага келганди. Чиптахона жуда катта танаффуслар билан оз миқдордаги чипталарни сотган. Мухлислар ёпиқ чиптахонага навбатда турган вақтда чайқовчилар ҳеч қандай тақиқсиз олди-сотди билан шуғулланди. Кассада 25 минг сўм бўлган чипталар «қўлда» 100—150 мингдан сотилди. Марказий секторлар учун белгиланган чипталар эса 400—500 минг сўмдан сотилди.
19:00 ларга яқин чиптахона ёпилгани маълум қилинди ва тартибсизлик кучайиб кетди. Шундан сўнг Миллий гвардия ходимлари чиптахона атрофини мухлислардан «тозалади». Миллий гвардия ходимлари бунинг учун кўздан ёш оқизувчи газдан фойдалангани айтилганди. Бироқ Миллий гвардия бундай маълумотларни инкор этди ва «стадиони кассалари олдида тартибни сақлаш учун ҳеч қандай куч ишлатиш ёки махсус воситалардан фойдаланилмаганини» маълум қилди.
18 июнь куни ҳам минглаб одамлар «Бунёдкор» стадиони атрофида чипта учун навбатда турибди. Нархлар тобора кўтарилиб бораётгани айтилмоқда.
Изоҳ (0)