O‘zbekiston qurilish sohasiga Yaponiya mutaxassislarini jalb qiladi

O‘zbekiston qurilish vazirining birinchi o‘rinbosari Davron Odilov boshchiligidagi delegatsiya Yaponiyaga xizmat safari amalga oshirdi, deb xabar beradi “Dunyo” agentligi.

Tashrif doirasida delegatsiya a’zolari Yaponiyaning qator vazirlik, tashkilot va oliy o‘quv yurtlarida bo‘lgan. Xususan, Yaponiya Yer resurslari, infratuzilma, transport va turizm vazirligi, Yaponiya qurilish taraqqiyoti markazi, Tokio universiteti hamda Yaponiya xalqaro hamkorlik agentligi (JICA) bilan muzokaralar o‘tkazilgan.

O‘zbekiston va Yaponiya o‘rtasida qurilish sohasida ikki tomonlama aloqalar o‘rnatish, ko‘p qavatli zilzilabardosh binolarni loyihalashtirish, ekspertiza qilish, qurish normalari va qoidalarini, qurilish texnologiyalarini hamda shaharsozlik sohasida Yaponiyaning ilg‘or tajribasini o‘rganish va O‘zbekistonda qo‘llash bilan bog‘liq masalalar atroflicha muhokama qilingan.

Tokio universiteti, Toshkent arxitektura qurilish instituti, Samarqand davlat arxitektura-qurilish instituti va ularning fakultetlari o‘rtasida shaharsozlikni rivojlantirish, arxitektura, qurilish ishi kabi yo‘nalishlarda talabalarni o‘qitish, professor-o‘qituvchilar va fakultetlar o‘rtasida samarali hamkorlikni yo‘lga qo‘yish takliflari bildirilgan.

Bundan tashqari, qurilish sohasida Yaponiya mutaxassislarini O‘zbekistonga jalb qilish, o‘zbekistonlik quruvchilarning Yaponiyada malakasini oshirish, shuningdek, ta’lim yo‘nalishida O‘zbekistonda arxitektura va qurilish sohasida kadrlarni tayyorlash maqsadida JICA grantlarini jalb qilgan holda Yaponiyaning qurilish sohasiga ixtisoslashgan universitetlarida o‘zbekistonlik talabalar uchun o‘qishlarni tashkil etish bo‘yicha ham qator kelishuvlarga erishilgan.