Shavkat Mirziyoyev 17-iyun kuni Bolalar gematologiyasi, onkologiyasi va klinik immunologiyasi markazi faoliyati bilan tanishdi. Bu haqda Prezident matbuot xizmati xabar qildi.
Qayd etilishicha, davlat rahbari bu muassasaning eski binosini o‘tgan yili 14-mayda borib ko‘rgan. U paytda shifoxona Respublika gematologiya markazi bo‘lib, kattalarga ham, bolalarga ham bir joyda xizmat ko‘rsatilgan. Dori ta’minoti yetarli bo‘lmagani, ximiya terapiya usullari yo‘lga qo‘yilmagani sababli davolanish samaradorligi 30 foizdan oshmagan.
Shu sababli yangi muassasa uchun Toshkent shahri Chilonzor tumani Arnasoy ko‘chasida qurilgan yangi bino berilgan va joriy yil yanvardan ish boshlagan.
Davlat rahbari bu yerdagi sharoitlar bilan yaqindan tanishgan. Yangi markazda o‘rinlar soni oldingi 85 tadan 160 taga yetkazilgan. Bemor bola va uning ota-onasi uchun alohida shart-sharoitlar yaratilgan. Bugungi kunda 101 nafar bola davolanmoqda. 130 dan ortiq shifokor, jumladan, 38 nafar ilmiy xodim va yuzlab hamshira ishlamoqda.
Bolalar onkogematologiyasi, gematologiya, onkologiya, reanimatsiya, gemodializ va plazmoferez bo‘limlari, statsionar va maslahat poliklinikasi zamonaviy jihozlangan. Bu yil avvalgilariga qo‘shimcha 14 turdagi asbob-uskuna keltirib o‘rnatilgan.
Dori vositalari bilan ta’minlash darajasi ham oshirilgan. 2016-yilda buning uchun 2 milliard 800 million so‘m mablag‘ ajratilgan. Hozir bu miqdor qariyb 60 baravar oshirilib, 170 milliard so‘mga yetgan. 91 turdagi onkogematologik dori vositalari davlat hisobidan bepul berilmoqda.
Chet ellik konsultantlar jalb etilib, davolash va diagnostika standartlari yangilangan. Jumladan, o‘zak xujayralari transplantatsiyasi soni oshgan. Molekular genetika, immunogistoximiya kabi murakkab tashxislar shu yerning o‘zida yo‘lga qo‘yilgan. Ilgari buning uchun namunalar Hindiston, Turkiya, Rossiya kabi davlatlarga tekshirish uchun yuborilgan.
Bu yerda “Zamin” fondi tomonidan 40 o‘rinli maktab va 30 o‘rinli bog‘cha tashkil etilgan. “Mehrli maktab” va “Ilk qadam” nomli ushbu muassasalarda bolalar bilim oladi.
Prezident markazda davolanayotgan bolalar va ularning onalariga dalda bergan.
“Yoningizga yana kelishdan maqsadim — sizlarga kuch berish, umidni ikki karra ko‘paytirish. Bu hammamizga sinov. Biz davlat bo‘lib, aqlimizni, kuchimizni ishga solib, bu kasalliklarni yengishimiz kerak. Ota-onalarga ko‘mak berib, bolalarning dardiga malham bo‘lib, ularni sog‘aytirishimiz zarur”, — degan Shavkat Mirziyoyev.
Shu yerda Bolalar gematologiyasi, onkologiyasi va klinik immunologiyasi markazi faoliyatini kengaytirish rejalari to‘g‘risida ma’lumot berilgan. Unga ko‘ra, gemapoetik o‘zak hujayralarini allogen va autologik transplantatsiya qilish uchun 2 ta aseptik bino, hududlardan uzoq muddatga keladiganlar uchun 200 o‘rinli xostel barpo etiladi. Yil yakunigacha markazga yana 67 turdagi jihozlar keltiriladi.
“Bu soha yurtimizda yangi tizim. Endi uni hududiy shifoxonalardagi shunday bo‘limlar bilan bog‘lab, kasalliklarni erta aniqlash zarur. Quyi pog‘onada skriningni kengaytirib, ‘kasallikdan oldin yurish’ kerak”, — degan prezident.
Ushbu markaz negizida ilmni rivojlantirish muhimligi ta’kidlangan.
“Binoda sharoit bor, muvaffaqiyat yo‘q. Muvaffaqiyat ilmda! Shuning uchun bu yer kasallik omillaridan tortib, samarali davolash uslublarigacha o‘rganish bo‘yicha ilmiy markaz bo‘lishi kerak. Viloyatlardagi tibbiyot xodimlari kelib, malaka oshirsin”, — degan davlat rahbari.
Bu soha rivojlangan Germaniya tajribasi asosida davolash protokolini yangilash, mutaxassislar jalb etish bo‘yicha ko‘rsatmalar berilgan.
Izoh (0)