Ijtimoiy tarmoqlarda ayol yosh go‘dagiga shafqatsiz munosabatda bo‘layotgani aks etgan video tarqaldi. Voqea Samarqand viloyati Payariq tumani 1-son Chelak shifoxonasida sodir bo‘lgan. “Daryo” muxbiri holatga aniqlik kiritish maqsadida jurnalistik surishtiruv olib bordi.
Ma’lum bo‘lishicha, bemor bolaning onasi 1988-yilda tug‘ilgan Malohat Nishonova Payariq tumaning “Boshqo‘rg‘on” mahallasida yashaydi. 2020-yilda tug‘ilgan farzandi bolalar serebrar falaji kasalligi bilan og‘rigan. 14-iyun kuni Malohat Nishonova farzandiga muolaja olish uchun shifoxonaga olib kelgan.
“Bolani tan jarohati olganligi yoki uni urganligini o‘z ko‘zim bilan ko‘rmadim. Palatasida birga davolanayotgan onalar ko‘rib, bolasini urmasligini tushuntirgan. Ular bizga ham bolasini uryapti, deb aytgan edi. Biz kirib ayolga tushuntirdik, bolani urgani bilan yaxshi bo‘lmasligini, vaqti bilan davolansa, yaxshi bo‘lib ketishi haqida aytdik. Shu holat qaytarilaversa, ertaga onalikdan ham mahrum qilinishing mumkin, qolaversa, ruhiy holati ham yaxshi emas, degan xulosaga ham kelib qolishi mumkin deb tushuntirib aytdik”, — deydi 1-son Chelak shifoxonasi bolalar bo‘limi boshlig‘i Faxriddin Do‘smatov.
Faxriddin Do‘smatovning ta’kidlashicha, ayol hech qanday ruhiy kasal emas. Shifokorlar bilan suhbatda barcha savollarga aniq javob bergan.
“Ayolning hushi o‘zida. Nevrologik yoki psixologik kasalliklari yo‘q. U bilan gaplashganimizda tug‘ilganidan beri kasallikdan boshi chiqmasligi, kasal bolaga qarashdan charchab ketganligini aytdi. Ayol ruhiy kasalliklar shifoxonasida ro‘yxatda turmagan”, — deydi Faxriddin Do‘smatov.
“Boshqo‘rg‘on” mahallasi raisi Erkinoy Xudoyberdiyevaning aytishicha, Malohat Nishonova farzandlariga mehrli. Oilasida hech qachon janjal bo‘lmagan. Bola 24 soat uxlamagani uchun ham ona bolaga qarashdan charchab qolgan.
“Malohat Nishonovaning yana ikki nafar farzandi bor: bir o‘g‘il, bir qiz. Oilasi tinch. Bolalarga mehrli, yaxshi ona. Farzandi 2020-yil oktabr oyida tug‘ilgan. U nogiron. Har doim isitmasi baland bo‘ladi. Shifoxonalarda muntazam ravishda bolasini davolatadi.
Bola 24 soat uxlamaydi. Onaning bolaga qarash sharoiti og‘ir. Ona kasal bolaga qarab juda ham charchab ketgan. Hozir nafaqat bolaga, balki onasiga ham yordam kerak. Hattoki ovqat yesa ham turmush o‘rtog‘i bilan navbatlashib, bolaga qarab ovqatlanib olishadi”, — deydi Erkinoy Xudoyberdiyeva.
Bolaning otasi G‘ulom Nishonovning aytishicha, farzandi 7 oylik tug‘ilgan. Turmush o‘rtog‘i nafaqat o‘zining, balki boshqa bolalarga ham hech qachon qo‘pol munosabatda bo‘lmagan.
“Uyda hech qachon bunday voqea bo‘lmagan. Oilada yaxshimiz. O‘z bolasini ham, boshqaning bolasini ham biror marotaba urishmagan. Hammasini yaxshi ko‘radi. Hali holat yuzasidan turmush o‘rtog‘im bilan gaplashishga ham ulgurmadim. Uning o‘zi ham bilmay qolgan. Video ijtimoiy tarmoqlarga chiqib, uyga uchastkavoylar borganidan keyin bilgan. Qilgan ishi uchun urishib qo‘yishim mumkin, ammo unga jazo bermayman. Bola charchatib qo‘yadi. Meni o‘zim ham kecha ertalabgacha qarab chiqdim. Har kuni shu ahvol. Har kuni yo men, yoki turmush o‘rtog‘im uxlamaydi. Tug‘ilganidan buyon ahvol shu”, — deydi G‘ulom Nishonov
Samarqand viloyati IIB matbuot kotibi Jahongir Sagdullayevning ma’lum qilishicha, holat yuzasidan Jinoyat kodeksining 110-moddasi ikkinchi qismi bilan jinoyat ishi qo‘zg‘atilgan.
“Bola ayni paytda Samarqand viloyat bolalar ko‘p tarmoqli tibbiyot markazining reanimatsiya bo‘limiga yotqizilgan. Bosh shifokor Mamatqul Azizovning aytishicha, shifoxona tomonidan bola otaliqqa olingan. Bolaning ahvoli og‘ir: bu kasalligi bilan bog‘liq. Bolada sepsis belgilari bor. Isitmasi baland, ozg‘in, oqsil yetishmovchiligi bor. Hozir bola davolanishi uchun reanimatsiya bo‘limiga yotqizilgan. Unda hech qanaqa jarohat izi yo‘q. Ko‘karish yoki qattiq urish belgilari ko‘rinmaydi. Bola shifoxonaga yotqizilganligi uchun faqatgina ukollarning o‘rni bor. Boladan to‘liq tahlillar olindi. 2021-yilning sentabr oyida ham bola bizda davolangan. Onasining bunday xatti-harakatini videoga ko‘rganimizdan so‘ng surishtiruv ishlari olib bordik. Davolangan bo‘limning barcha xodimlari bilan gaplashdik, onasida avval bunday harakat kuzatilmagan”, — deydi Mamatqul Azizov.
Izoh (0)