Ўзбекистон қурилиш вазирининг биринчи ўринбосари Даврон Одилов бошчилигидаги делегация Японияга хизмат сафари амалга оширди, деб хабар беради «Дунё» агентлиги.
Ташриф доирасида делегация аъзолари Япониянинг қатор вазирлик, ташкилот ва олий ўқув юртларида бўлган. Хусусан, Япония Ер ресурслари, инфратузилма, транспорт ва туризм вазирлиги, Япония қурилиш тараққиёти маркази, Токио университети ҳамда Япония халқаро ҳамкорлик агентлиги (JICA) билан музокаралар ўтказилган.
Ўзбекистон ва Япония ўртасида қурилиш соҳасида икки томонлама алоқалар ўрнатиш, кўп қаватли зилзилабардош биноларни лойиҳалаштириш, экспертиза қилиш, қуриш нормалари ва қоидаларини, қурилиш технологияларини ҳамда шаҳарсозлик соҳасида Япониянинг илғор тажрибасини ўрганиш ва Ўзбекистонда қўллаш билан боғлиқ масалалар атрофлича муҳокама қилинган.
Токио университети, Тошкент архитектура қурилиш институти, Самарқанд давлат архитектура-қурилиш институти ва уларнинг факультетлари ўртасида шаҳарсозликни ривожлантириш, архитектура, қурилиш иши каби йўналишларда талабаларни ўқитиш, профессор-ўқитувчилар ва факультетлар ўртасида самарали ҳамкорликни йўлга қўйиш таклифлари билдирилган.
Бундан ташқари, қурилиш соҳасида Япония мутахассисларини Ўзбекистонга жалб қилиш, ўзбекистонлик қурувчиларнинг Японияда малакасини ошириш, шунингдек, таълим йўналишида Ўзбекистонда архитектура ва қурилиш соҳасида кадрларни тайёрлаш мақсадида JICA грантларини жалб қилган ҳолда Япониянинг қурилиш соҳасига ихтисослашган университетларида ўзбекистонлик талабалар учун ўқишларни ташкил этиш бўйича ҳам қатор келишувларга эришилган.
Изоҳ (0)