Turkmaniston prezidenti Serdar Berdimuhamedov o‘z ammasi (otasi va sobiq prezident Gurbanguli Berdimuhamedovning singlisi) Gulnabat Dovletovani Turkmaniston Milliy Qizil yarim oy jamiyati bosh direktori lavozimidan ozod qilgani haqida “Xronika Turkmenistana” xabar berdi.
Nashrlarning yozishicha, bu aprel oyida, kichik Berdimuhamedov inauguratsiyasidan keyin sodir bo‘lgan. Xabarlarga ko‘ra, u qarindoshlariga otasi kabi yaxshi munosabatda bo‘lmayapti.
Dovletovaning ishdan bo‘shatilishiga Serdarning amakivachchasi Shamurod Rejepov bilan yomon munosabatda bo‘lgani sabab bo‘lgan.
Xalq orasida “Shammi-bespredelshik” nomi bilan mashhur bo‘lgan Shamurod Rejepov Qizil yarim oy jamiyatining imkoniyatlaridan o‘z maqsadlari uchun foydalangan. Masalan, u tashkilot orqali mamlakatga muddati o‘tgan sigaret, konserva va boshqa mahsulotlar olib kirgan. Bularning barchasi tanqislik sharoitida osongina sotilgan”, — deya xabar beradi nashr o‘z manbasiga tayanib.
Aprel oyining birinchi yarmida “Xronika Turkmenistana”ning ikki manbasi ham yangi prezident yaqinlari ta’qibga uchragani haqida xabar bergan edi.
“Xronika Turkmenistana”ning xabar berishicha Hojimurad va Shamurod Rejepovlar (prezidentning qarindoshlari) prezidentlik saylovlarining ertasigayoq mamlakatni tark etib, aprel oyi boshida Dubayda bo‘lgan. Ma'lumki, Turkmanistondagi ularga va ularning biznes tuzilmalariga tegishli barcha hisob raqamlari muzlatilgan. Bu paytda ularning Ashxoboddagi savdo markazlari va restoranlari o‘z faoliyatini davom ettirgan.
O‘sha paytda Qizil yarim oy jamiyati rahbari Gulnabat Dovletovadan davlat budjetiga 60 million manatga (davlat kursi bo‘yicha 17,1 million dollar, qora bozor kursi bo‘yicha esa 3 million dollar) yaqin mablag‘ni qaytarish talab qilingan. Tashkilot uchun davlat tomonidan mablag‘ ajratilgan, ammo keyin pul Dovletova bilan bog‘liq bo‘lgan ba’zi vositachi firmalarning hisob raqamlariga o‘tkazilgan. Unga jamiyatning moliyaviy va moddiy resurslaridan noto‘g‘ri foydalanganlik uchun jinoiy ish qo‘zg‘atish bilan tahdid qilingan. Xususan, Qizil yarim oy balansida qayd etilgan uchta “KamAZ” avtomashinasi Gulnabatning turmush o‘rtog‘iga tegishli kompaniyalar tomonidan boshqariladi. Bundan tashqari, uning qizi Dubayda savdo markazi va restoranga ega bo‘lib, ular ham ochilishi va faoliyat yuritishi uchun jamiyat mablag‘laridan foydalanilgan.
O‘shanda Gulnabat onasi, mamlakat prezidentining buvisi yordami bilan ishdan bo‘shatilish va jinoiy ish ochilishidan qutulib qolgan.
Ma’lumotlarga ko‘ra, Gulnabat, Hojimurod va Shamurodlarni ta’qib qilish – yangi prezident tashabbusi.
Serdar Berdimuhamedov ularning qo‘lida to‘plangan yirik moliyaviy resurslar, ularning yuqori mansabdor shaxslar, jumladan, huquqni muhofaza qilish organlari bilan aloqalari (biznes manfaatlari) o‘ziga qarshi ishlatilishi va mamlakatdagi mavjud barqarorlikni buzishi mumkinligidan xavotirlangan.
Izoh (0)