Туркманистон президенти Сердар Бердимуҳамедов ўз аммаси (отаси ва собиқ президент Гурбангули Бердимуҳамедовнинг синглиси) Гулнабат Довлетовани Туркманистон Миллий Қизил ярим ой жамияти бош директори лавозимидан озод қилгани ҳақида «Хроника Туркменистана» хабар берди.

Нашрларнинг ёзишича, бу апрель ойида, кичик Бердимуҳамедов инаугурациясидан кейин содир бўлган. Хабарларга кўра, у қариндошларига отаси каби яхши муносабатда бўлмаяпти.

Довлетованинг ишдан бўшатилишига Сердарнинг амакиваччаси Шамурод Режепов билан ёмон муносабатда бўлгани сабаб бўлган.

Халқ орасида «Шамми-беспределшик» номи билан машҳур бўлган Шамурод Режепов Қизил ярим ой жамиятининг имкониятларидан ўз мақсадлари учун фойдаланган. Масалан, у ташкилот орқали мамлакатга муддати ўтган сигарет, консерва ва бошқа маҳсулотлар олиб кирган. Буларнинг барчаси танқислик шароитида осонгина сотилган», — дея хабар беради нашр ўз манбасига таяниб.

Апрель ойининг биринчи ярмида «Хроника Туркменистана»нинг икки манбаси ҳам янги президент яқинлари таъқибга учрагани ҳақида хабар берган эди.

«Хроника Туркменистана»нинг хабар беришича Ҳожимурад ва Шамурод Режеповлар (президентнинг қариндошлари) президентлик сайловларининг эртасигаёқ мамлакатни тарк этиб, апрель ойи бошида Дубайда бўлган. Маълумки, Туркманистондаги уларга ва уларнинг бизнес тузилмаларига тегишли барча ҳисоб рақамлари музлатилган. Бу пайтда уларнинг Ашхободдаги савдо марказлари ва ресторанлари ўз фаолиятини давом эттирган.

Ўша пайтда Қизил ярим ой жамияти раҳбари Гулнабат Довлетовадан давлат бюджетига 60 миллион манатга (давлат курси бўйича 17,1 миллион доллар, қора бозор курси бўйича эса  3 миллион доллар) яқин маблағни қайтариш талаб қилинган. Ташкилот учун давлат томонидан маблағ ажратилган, аммо кейин пул Довлетова билан боғлиқ бўлган баъзи воситачи фирмаларнинг ҳисоб рақамларига ўтказилган. Унга жамиятнинг молиявий ва моддий ресурсларидан нотўғри фойдаланганлик учун жиноий иш қўзғатиш билан таҳдид қилинган. Хусусан, Қизил ярим ой балансида қайд этилган учта «КамАЗ» автомашинаси Гулнабатнинг турмуш ўртоғига тегишли компаниялар томонидан бошқарилади. Бундан ташқари, унинг қизи Дубайда савдо маркази ва ресторанга эга бўлиб, улар ҳам очилиши ва фаолият юритиши учун жамият маблағларидан фойдаланилган.

Ўшанда Гулнабат онаси, мамлакат президентининг бувиси ёрдами билан ишдан бўшатилиш ва жиноий иш очилишидан қутулиб қолган.

Маълумотларга кўра, Гулнабат, Ҳожимурод ва Шамуродларни таъқиб қилиш – янги президент ташаббуси.

Сердар Бердимуҳамедов уларнинг қўлида тўпланган йирик молиявий ресурслар, уларнинг юқори мансабдор шахслар, жумладан, ҳуқуқни муҳофаза қилиш органлари билан алоқалари (бизнес манфаатлари) ўзига қарши ишлатилиши ва мамлакатдаги мавжуд барқарорликни бузиши мумкинлигидан хавотирланган.