Тошкент—Волгоград—Тошкент йўналишида йўловчи поездлар қатнови йўлга қўйилади

25 июндан бошлаб Тошкент—Волгоград—Тошкент йўналишларида йўловчи поездининг ҳаракати бошланади. Бу ҳақда «Ўзбекистон темир йўллари» хабар берди.

Маълум қилинишича, 324/323-сонли Тошкент—Волгоград—Тошкент йўналишларида йўловчи поезд ҳафтанинг шанба куни соат 23:58 да Тошкент марказий темир йўл вокзалидан жўнаб кетади ва сешанба куни соат 09:56 да Россиянинг «Волгоград» темир йўл вокзалига етиб боради. Волгограддан эса сешанба куни соат 19:59 да жўнаб кетиб, Тошкент марказий вокзалига жума куни соат 06:54 да етиб келади.

Маълумот учун, Тошкентдан Волгоградгача темир йўл орқали бўлган бўлган масофа 2996 километрни ташкил этади. Поезд 60 соат давомида ҳаракатланади. 324/323-сонли йўналишдаги йўловчи поезд 11 та вагондан иборат: 3 купе, 7 плацкарт ва вагон-ресторан.

Чипта нархи тўғрисидаги маълумотни, сотув муддатига қараб чегирмаларни ҳисобга олган ҳолда, «Chipta.railway.uz», «E-ticket.railway.uz» сайтлари орқали билиб олиш мумкин.

Аввалроқ 23 июндан бошлаб 5/6-сонли Тошкент—Самара—Тошкент йўналишида йўловчи поездининг ҳаракати йўлга қўйилиши тўғрисида хабар берилганди.

Эслатиб ўтамиз, Ўзбекистонда илк бор коронавирус аниқланган 2020 йил 16 мартдан бошлаб темир йўл транспорти қатновлари тўхтатилган эди. 2020 йилнинг 15 августидан маҳаллий авиа ва темир йўл қатновлари босқичма-босқич тикланган. 2020 йилнинг июнь бошларида 14 июндан бошлаб Тошкент—Самара ва Тошкент—Волгоград йўналишлари бўйича ҳафтасига бир марта темир йўл қатнови қайта тикланаётгани маълум бўлганди.