Amerikaning Tesla kompaniyasi yetkazib berish zanjiridagi uzilishlar tufayli elektromobillarining barcha modellari narxini oshirdi. Bu haqda Business Insider xabar bermoqda.
Model X elektromobillarining narxi 6 ming dollarga oshib, 120 990 dollarga, Model S narxi esa 62 990 dollardan 65 990 dollarga ko‘tarildi.
Narxlarning so‘nggi oshishi kompaniyaga iqtisodiy muammolar ta’sir qilishidan qo‘rqish fonida sodir bo‘ldi.
Shu oy boshida Tesla bosh direktori Ilon Mask kompaniya rahbariyatiga yo‘llagan maktubida “global iqtisodiyotga nisbatan juda yomon his-tuyg‘ularga ega ekanligini” aytgan edi.
Tadbirkor, shuningdek, ish o‘rinlarining 10 foizini qisqartirish va yangi xodimlarni ishga olishni to‘xtatib qo‘yish rejalarini ham ma’lum qildi.
Nashr manbasining ta’kidlashicha, kompaniya bo‘ylab ishdan bo‘shatish allaqachon boshlangan.
Reuters xabariga ko‘ra, Tesla o‘zining ba’zi uzoq masofali avtomobillarini AQSHga yetkazib berishni bir oyga kechiktirdi.
O‘tgan yili kompaniya kompyuter chiplari yetkazib berish va xomashyo narxining oshishi bilan bog‘liq muammolarga duch keldi.
Tesla, shuningdek, Xitoyning qat’iy COVID-19 siyosati tufayli global ishlab chiqarish bilan kurashdi.
2021-yilda kompaniyaning global avtomobil ishlab chiqarishining yarmini tashkil etgan Tesla kompaniyasining Shanxaydagi zavodi koronavirus holatlari ko‘payganligi sababli 2022-yil mart oyida uch haftaga yopilishga majbur bo‘ldi.
O‘zbekistonda Tesla narxlari 43 ming dollardan 210 ming dollargacha bo‘lmoqda. Internetda ayni paytda 90 dan ortiq Tesla elektromobili sotilishi haqidagi e’lonlar mavjud. O‘rtacha narxlar 70-80 ming dollar atrofida bo‘lmoqda.
Mavzuga doir:
Izoh (0)