Американинг Tesla компанияси етказиб бериш занжиридаги узилишлар туфайли электромобилларининг барча моделлари нархини оширди. Бу ҳақда Business Insider хабар бермоқда.
Модель Х электромобилларининг нархи 6 минг долларга ошиб, 120 990 долларга, Model S нархи эса 62 990 доллардан 65 990 долларга кўтарилди.
Нархларнинг сўнгги ошиши компанияга иқтисодий муаммолар таъсир қилишидан қўрқиш фонида содир бўлди.
Шу ой бошида Tesla бош директори Илон Маск компания раҳбариятига йўллаган мактубида «глобал иқтисодиётга нисбатан жуда ёмон ҳис-туйғуларга эга эканлигини» айтган эди.
Тадбиркор, шунингдек, иш ўринларининг 10 фоизини қисқартириш ва янги ходимларни ишга олишни тўхтатиб қўйиш режаларини ҳам маълум қилди.
Нашр манбасининг таъкидлашича, компания бўйлаб ишдан бўшатиш аллақачон бошланган.
Reuters хабарига кўра, Tesla ўзининг баъзи узоқ масофали автомобилларини АҚШга етказиб беришни бир ойга кечиктирди.
Ўтган йили компания компьютер чиплари етказиб бериш ва хом ашё нархининг ошиши билан боғлиқ муаммоларга дуч келди.
Tesla, шунингдек, Хитойнинг қатъий COVID-19 сиёсати туфайли глобал ишлаб чиқариш билан курашди.
2021 йилда компаниянинг глобал автомобиль ишлаб чиқаришининг ярмини ташкил этган Tesla компаниясининг Шанхайдаги заводи коронавирус ҳолатлари кўпайганлиги сабабли 2022 йил март ойида уч ҳафтага ёпилишга мажбур бўлди.
Ўзбекистонда Tesla нархлари 43 минг доллардан 210 минг долларгача бўлмоқда. Интернетда айни пайтда 90 дан ортиқ Tesla электромобили сотилиши ҳақидаги эълонлар мавжуд. Ўртача нархлар 70-80 минг доллар атрофида бўлмоқда.
Мавзуга доир:
Изоҳ (0)