IKEA kompaniyasi Rossiyadagi faoliyatini butunlay tugatmoqchi. Bu haqda jurnalistlarga rahbariyat bilan o‘tkazilgan uchrashuvlar yakunlari bo‘yicha kompaniya xodimlari va kasaba uyushmalari vakillari ma’lum qildi.
Kompaniyaning rasmiy bayonotida Rossiya va Belarusdagi “biznes ko‘lamining yanada qisqarishi” haqida aytib o‘tilgan. Ishchilarning katta qismiga ketish taklif qilingan; ish haqi yoz oxirigacha, sug‘urta esa yil oxirigacha saqlanadi. IKEA Rossiyadagi barcha to‘rtta mebel fabrikasini sotmoqchi. Moskva va Minskdagi logistika markazlari yopiladi. Shvetsiya kompaniyasi chakana savdoni qayta tiklashni rejalashtirmayapti, biroq rahbariyat yaqin kelajakda omborlarni bo‘shatish uchun onlayn savdo tashkil etishga va’da bermoqda – u ham keyinchalik sotiladi.
IKEA mart oyi boshidayoq Rossiya va Belarusdagi faoliyatini to‘xtatayotganini e’lon qilgandi. O‘shanda bu ta’minotning buzilishi va xorijiy sanksiyalar tufayli yuzaga kelgan muammolar bilan izohlandi. Kompaniyaning Rossiyadagi xodimlari soni 15 ming kishiga yetadi.
Shu bilan birga, IKEA bilan bir guruhga kiruvchi “Mega” savdo markazlari ishlashda davom etmoqda.
Izoh (0)