IKEA компанияси Россиядаги фаолиятини бутунлай тугатмоқчи. Бу ҳақда журналистларга раҳбарият билан ўтказилган учрашувлар якунлари бўйича компания ходимлари ва касаба уюшмалари вакиллари маълум қилди.
Компаниянинг расмий баёнотида Россия ва Беларусдаги «бизнес кўламининг янада қисқариши» ҳақида айтиб ўтилган. Ишчиларнинг катта қисмига кетиш таклиф қилинган; иш ҳақи ёз охиригача, суғурта эса йил охиригача сақланади. IKEA Россиядаги барча тўртта мебель фабрикасини сотмоқчи. Москва ва Минскдаги логистика марказлари ёпилади. Швеция компанияси чакана савдони қайта тиклашни режалаштирмаяпти, бироқ раҳбарият яқин келажакда омборларни бўшатиш учун онлайн савдо ташкил этишга ваъда бермоқда – у ҳам кейинчалик сотилади.
IKEA март ойи бошидаёқ Россия ва Беларусдаги фаолиятини тўхтатаётганини эълон қилганди. Ўшанда бу таъминотнинг бузилиши ва хорижий санкциялар туфайли юзага келган муаммолар билан изоҳланди. Компаниянинг Россиядаги ходимлари сони 15 минг кишига етади.
Шу билан бирга, IKEA билан бир гуруҳга кирувчи «Мега» савдо марказлари ишлашда давом этмоқда.
Изоҳ (0)