Rossiyaning sobiq prezidenti, Rossiya Federatsiyasi Xavfsizlik kengashi rahbari o‘rinbosari Dmitriy Medvedev Telegram kanalidagi postida ikki yildan keyin Ukrainaning mavjud bo‘lishini shubha ostiga oldi.
Post Ukraina AQSHdan uni lend-liz doirasida gaz bilan ta’minlashni so‘ragani, gaz uchun to‘lovni ikki yildan keyin amalga oshirmoqchiligi haqidagi xabarlarga munosabat tarzda yozilgan.
Faqat bir savol bor. Ikki yildan keyin Ukraina dunyo xaritasida umuman mavjud bo‘ladi, deb kim aytdi?Medvedev nima sababdan ikki yildan keyin Ukraina jahon xaritasida yo‘q bo‘lishi mumkinligini aytmagan. Rossiya qo‘shinlari tomonidan Ukraina hududlarining bosib olinayotgani haqida postda so‘z yuritilmagan. Avvalroq Medvedev Polsha “Ukrainaning bo‘linishi”ni uyushtirmoqchiligi haqida gapirgan edi.
Rossiya 24-fevral kuni Ukrainaga keng ko‘lamda bostirib kira boshladi. Urush mobaynida Rossiya deyarli butun Xerson viloyatini va Zaporojye viloyatining muhim qismini nazorat ostiga oldi. Donbass uchun jangda Rossiya Lugansk viloyatini deyarli to‘liq egallab oldi, Donetsk viloyatida esa o‘z nazorati ostidagi hududlarni kengaytirdi.
Urush boshida Rossiya prezidenti Vladimir Putin Rossiya Ukraina hududlarini bosib olmoqchi emasligini aytgan edi, ammo ko‘plab norasmiy va rasmiy dalillarga ko‘ra, Kreml DXR, LXR va Ukraina janubida bosib olingan hududlarni anneksiya qilmoqchi.
Izoh (0)