Ички ишлар вазирлиги мухлисларни бугун, 15 июнь куни соат 21:00 да 23 ёшгача бўлган Ўзбекистон ҳамда Япония ёшлар терма жамоалари ўртасида Осиё кубоги ярим финал учрашуви бўлиб ўтадиган «Бунёдкор» стадионига бормасликка чақирди. Бу ҳақда вазирлик матбуот котиби Шоҳрух Ғиёсов хабар қилди.
«ОФК тартиб-интизом қўмитаси Ўзбекистон U23 ҳамда Ироқ U23 жамоалари ўртасидаги ўйинда мухлислар томонидан содир этилган ножўя хатти-ҳаракатлар юзасидан тегишли қарор қабул қилди.
Унга кўра, Ўзбекистон-Япония ўртасидаги ярим финал баҳсига ўзбекистонлик мухлислар стадионга киритилмайди. Япониялик мухлисларга эса стадионга киришга рухсат берилади.
Шу ўринда юртдошларимизга футбол учрашувини томоша қилиш учун стадионга келмасдан, оила даврасида телеканаллар орқали кузатиб боришлари тавсия этилади», — дейилади хабарда.
Бундан ташқари, Тошкент шаҳар Ички ишлар бош бошқармасининг хабар қилишича, 15 июнь куни Чилонзор туманининг бир қатор кўчаларида йўл таъмирлаш ишлари олиб борилаётгани муносабати билан соат 17:00 дан соат 24:00 гача бўлган вақтда автотранспорт воситалари учун ҳаракат вақтинчалик чекланади. Жумладан:
- Муқимий ва Чилонзор кўчалари чорраҳасидан Чилонзор ва КҲАЙ кўчалари чорраҳасигача бўлган қисми;
- Муқимий ва Арнасой кўчалари чорраҳасидан Чўпонота ва Арнасой кўчалари чорраҳасигача бўлган қисми;
- Бунёдкор иккинчи даражали кўчасидан Чўпонота кўчасигача бўлган қисми.
Шунга қарамай, футбол учрашувини томоша қилиш учун «Бунёдкор» стадиони атрофига катта монитор ўрнатилмоқда.
Эслатиб ўтамиз, Осиё Кубоги—2022 1/4 финали доирасидаги Ироққа қарши кечган баҳснинг биринчи бўлим бошида ҳакамнинг қарорлари ва рақиб футболчиларидан норози бўлган айрим мухлислар майдон ҳамда техник ҳудуд томон қаттиқ буюмларни улоқтирганди. Улоқтирилган жисмлар туфайли бир нафар ўзбекистонлик фотосуратчи ва бир нафар хорижлик оператор жароҳат олган.
ОФК Тартиб-интизом қўмитаси юзага келган вазиятларни ўрганиб чиқиб, Ўзбекистон U-23 терма жамоаси футболчиси Абдувоҳид Неъматовга нисбатан 3 та ўйинга четлатиш (дисквалификация) ва жарима (500 АҚШ доллари) интизом чорасини қўллаш, Олимпия терма жамоасининг ярим финал доирасида Японияга қарши учрашувини мухлисларсиз ўтказиш ҳамда Ўзбекистон футбол ассоциациясига жарима интизом чорасини қўллаш юзасидан қарор чиқарди.
Изоҳ (0)