Qashqadaryo viloyatining Shahrisabz shahrida bir kishi bir necha kishi tomonidan pichoqlangani aytilmoqda. Bu haqda “Daryo”ga pichoqlangan yigitning opasi ma’lum qildi.
Shahrisabzlik Xurshida Saidova ukasi Jonibek Saidov 2022-yilning 12-iyun kuni shahardagi “Billur” to‘yxonasida bir necha kishi tomonidan pichoqlanganini, aybdorlar esa voqea joyidan qochib ketganini aytmoqda.“Ukam 10 kishi tomonidan beshta joyidan — qo‘lidan, yuzidan, orqa tomonlari va oyog‘idan pichoqlangan”, — deydi murojaatchi.
Xurshida Saidova ukasi uch kundan beri shifoxonada ekanini, ahvoli og‘irligini aytmoqda.
“Ukam uch kundan beri shifoxonada yotibdi. Hech kim e’tibor bermayapti. Ukamni pichoqlaganlar hech narsa bo‘lmagandek yuribdi. Nahotki inson hayoti shu darajada e’tiborsiz bo‘lib qoldi”, — deydi Xurshida Saidova.
Ukasi pichoqlangan ayol aybdorlar yashiringanini, IIB aybdorlarni hatto izlamayotganini aytmoqda.
“Voqea joyidan videotasvirlar bor. Barcha voqea ko‘ringan. Ammo IIB aybdorlarni izlamayapti. Ular yashiringan”, — deydi murojaatchi.
“Daryo”ning bu haqdagi so‘roviga javob bergan viloyat IIB axborot xizmati rahbari Javlon Baxtiyev holat o‘rganilayotganini, tez orada batafsil ma’lumot berilishini ma’lum qildi.
Izoh (0)