Andijon viloyatining Andijon shahriga yangi hokim tayinlandi, deya xabar berdi “Daryo” muxbiri.
Ma’lum qilinishicha, bugun Xalq deputatlari Andijon shahar Kengashining navbatdagi sessiyasi bo‘lib o‘tgan. Unda tashkiliy masala ko‘rilib, sobiq hokim Bahrom Haydarov o‘rniga G‘ofurjon Abdurahmonov shahar hokimi sifatida ish boshlagani aytilgan.
2022-yil boshidan ATB “ Qishloq qurilish bank” boshqaruv raisining maslahatchisi sifatida ishlab kelgan G‘ofurjon Abdurahmonov 1976-yil Andijon shahrida tug‘ilgan. U 1998-yil Andijon muhandislik iqtisodiyot instituti (sirtqi), 1999-yil Bank moliya akademiyasini (sirtqi), 2012-yil O‘zbekiston Respublikasi prezidenti huzuridagi Davlat va jamiyat qurilishi akademiyasini tamomlagan.
G‘ofurjon Abdurahmonov faoliyati davomida Markaziy bankning Andijon viloyati Bosh boshqarmasi boshlig‘i, shuningdek 2013—2022-yillar davomida ATB “Qishloq qurilish bank” boshqaruv raisi o‘rinbosari sifatida faoliyat yuritgan.
Avvalroq Bahrom Haydarovning davlat manfaatlariga 1,7 milliard so‘m zarar keltirganlikda ayblanayotgani, uning deputatlik daxlsizligini bekor qilish uchun viloyat prokuraturasiga taqdimnoma kiritilgani xabar qilingan edi. “Daryo” muxbiri bilan suhbatlashgan hokim esa buni inkor etgandi.
Izoh (0)