Қашқадарё вилоятининг Шаҳрисабз шаҳрида бир киши бир неча киши томонидан пичоқлангани айтилмоқда. Бу ҳақда «Дарё»га пичоқланган йигитнинг опаси маълум қилди.
Шаҳрисабзлик Хуршида Саидова укаси Жонибек Саидов 2022 йилнинг 12 июнь куни шаҳардаги «Биллур» тўйхонасида бир неча киши томонидан пичоқланганини, айбдорлар эса воқеа жойидан қочиб кетганини айтмоқда.«Укам 10 киши томонидан бешта жойидан — қўлидан, юзидан, орқа томонлари ва оёғидан пичоқланган», — дейди мурожаатчи.
Хуршида Саидова укаси уч кундан бери шифохонада эканини, аҳволи оғирлигини айтмоқда.
«Укам уч кундан бери шифохонада ётибди. Ҳеч ким эътибор бермаяпти. Укамни пичоқлаганлар ҳеч нарса бўлмагандек юрибди. Наҳотки инсон ҳаёти шу даражада эътиборсиз бўлиб қолди», — дейди Хуршида Саидова.
Укаси пичоқланган аёл айбдорлар яширинганини, ИИБ айбдорларни ҳатто изламаётганини айтмоқда.
«Воқеа жойидан видеотасвирлар бор. Барча воқеа кўринган. Аммо ИИБ айбдорларни изламаяпти. Улар яширинган», — дейди мурожаатчи.
«Дарё»нинг бу ҳақдаги сўровига жавоб берган вилоят ИИБ ахборот хизмати раҳбари Жавлон Бахтиев ҳолат ўрганилаётганини, тез орада батафсил маълумот берилишини маълум қилди.
Изоҳ (0)