Бугун, 13 июнь куни Олий Мажлис Сенатининг 27-ялпи мажлиси бўлиб ўтмоқда. Йиғилиш аввалида парламент юқори палатаси раиси Танзила Норбоева Ўзбекистон қаҳрамони Лолахон Муродованинг вафоти барчани қайғуга солганини айтди.
Танзила Норбоеванинг айтишича, Лолахон Муродова нафақат фермер, балки депутат ва сенатор сифатида ҳам фаол бўлган.
Мамлакатимиз ижтимоий-сиёсий, иқтисодий ҳамда маънавий ҳаёти билан боғлиқ бир қатор муҳим воқеалар содир бўлди. Аввало шуни айтиш керакки, Фарғона вилоятининг Олтиариқ туманидаги «Нурли обод» фермер хўжалиги раҳбари, Ўзбекистон Қаҳрамони, таниқли жамоат арбоби Лолахон Муродованинг вафоти барчамизни қайғуга солди.Ўзининг камтарлиги, самимийлиги ҳамда фидойилиги билан Лола опа ҳамманинг қалбидан жой олганди. Бутун умр дала билан тиллашиб, тунларни тонгга улаб меҳнат қилган Лола Муродова ўз ҳаёти давомида заҳматкаш ўзбек аёли нималарга қодир эканини намоён этиб кетди.
У киши биз билан ёнма-ён туриб, халқ депутатлари Фарғона вилояти кенгаши депутати, Олий Мажлис Сенати аъзоси сифатида республиканинг ижтимоий-сиёсий ҳаётида ҳам ҳар томонлама фаол иштирок этди. Лола Муродованинг ўз ватанига бўлган чексиз меҳр-муҳаббати, давлат тараққиёти йўлидаги жонфидолиги авлодлар учун ҳамиша ўрнак бўлиб қолади. Опани мамлакат тараққиёти учун қўшган ҳиссаси ёдимиздан чиқмайди», – деди Сенат раҳбари.
Изоҳ (0)