Бугун, 13 июнь куни Сенатда «Давлат мулкини бошқариш тўғрисида»ги қонун муҳокама қилинди. Бу ҳақда «Дарё» мухбири хабар бермоқда.
Қонунда давлат мулкини бошқариш принциплари, унга эгалик қилиш мезонлари белгиланмоқда. Давлат мулки республика ҳамда муниципал мулк турларига ажратилмоқда.
«Олмалиқ кон-металлургия комбинати» АЖ бошқаруви раиси Абдулла Хурсановнинг маълум қилишича, қонун билан давлат мулкидан фойдаланишда қаътий талаблар қўйилмоқда.
«Шу пайтга қадар давлат мулкини бошқариш самарадорлиги қай даражада экани, қанча давлат мулки борлиги ва улар қайси манбалар ҳисобидан бошқарилаётгани тўғрисидаги маълумотлар ошкор этилмаётган эди. Мазкур қонун асосида давлат мулки билан боғлиқ барча маълумотлар ошкор қилинади. Яна бир муҳим масала, қонунда соғлом рақобатни ривожлантириш кўзда тутилмоқда. Ҳужжат билан давлат ва нодавлат корхоналарига тенг имконият бериш, яъни давлат корхоналарига қўшимча имтиёзлар берилмаслиги белгиланмоқда. Шунингдек, қонун асосида давлат мулкидан фойдаланиш самарадорлигини баҳолаш механизми жорий этилади. Ортиқча ёки мақсадга мувофиқ фойдаланилмаган мулк тортиб олиниб, самарали бошқарувга берилади. Энг муҳими, давлат мулкини бошқаришда ҳисобдорлик, шаффофлик ва маълумотларни ошкор қилиниши белгиланмоқда. Бу давлатнинг иқтисодиётдаги иштирокини камайтиришга хизмат қилади», – деди компания раҳбари.
Мажлисда Сенат қўмитаси раиси Одилжон Эминов ҳам ўз фиркларини билдирди.
«Давлат – энг ёмон тадбиркор. Бугун Ўзбекистон ялпи ички маҳсулотининг қарийб ярми давлат корхоналари ҳиссасига тўғри келади. Ҳозирда иқтисодиётда давлат улушини қисқартириш муҳим аҳамиятга эга. Қонун ушбу мақсадларга ҳам хизмат қилади. Шу билан бирга, давлат мулкидан оқилона ва эҳтиёткорона фойдаланишда самарали имкониятлар яратади», – деди сенатор.
Изоҳ (0)