73 yoshida uylangan Ubaydulla Omondan Aziz Rametovgacha. O‘zbek shou-biznesida muhokamalarga sabab bo‘lgan to‘ylar (foto, video)

O‘zbek shou-biznesi vakillarining to‘ylari dunyo yulduzlarining nikoh oqshomlari singari katta shov-shuv va muhokamalarga sabab bo‘ladi.

So‘nggi yillarda bo‘lib o‘tgan va muhokamalarga sabab bo‘lgan nikoh oqshomlarining bir qanchasini eslaymiz.

O‘zbekiston xalq artisti Ubaydulla Omon 73 yoshida 44 yoshli qizga uylandi.

O‘zbekiston xalq artisti, “El-yurt hurmati” ordeni sohibi Ubaydulla Omon 2021-yil 22-mart kuni 73 yoshida 44 yoshli qizga uylandi.

Nikoh oqshomi Buxoro shahridagi “Tojimahal” to‘yxonasida bo‘lib o‘tgan hamda shu kuni aktyorning muchal to‘yi ham nishonlangan.

Ubaydullo Omon Buxoro shahar Xalq ta’limi bo‘limi ingliz tili metodisti va shahardagi 32-umumiy o‘rta ta’lim maktabi o‘qituvchisi 44 yoshli Nilufar Sherovaga uylangan. O‘zbekiston xalq artisti Nilufar Sherovaning ilk turmushi hisoblanadi. Ubaydulla Omonning 73 yoshida uylangani katta shov-shuvlarga sabab bo‘lgan edi.

Imronning 2,5 yil kutishga majbur bo‘lgani, qizil kastumi muhokama qilingan to‘yi

Xonanda Imron 2021-yil o‘zidan 12 yosh kichkina Sadaf ismli qizga uylandi. Eng qizig‘i Imron bo‘lajak turmush o‘rtog‘ini nikoh yoshiga yetishi uchun 2,5 yil kutishga majbur bo‘lgan. Nikoh oqshomi Buxoroning “Maroqan” restoranida, Toshkentning “O‘zbekiston” mehmonxonalarida bo‘lib o‘tgan edi.

“O‘zbekiston” mehmonxonasida bo‘lgan oqshomda xonanda Imronning qizil kastum kiygani katta muhokamalarga sabab bo‘lgan edi. Xonandaning o‘zi ham intervyularidan birida, qizil kastum kiyish sababini ma’lum qilgan.

To‘y bir marotaba bo‘ladi. Ushbu oqshomda eng sevimli rangimda kiyinishni xohladim. Albatta, kuyov bola qora kostyum kiyishi kerak, desangiz Buxorodagi to‘yimda qora kostyum-shimda bo‘lganman. Qizil  rangli kiyimni to‘ylarda ko‘pchilik kiygan. Lekin biz san’atkor bo‘lganimiz uchun bu ko‘pchilikka ko‘ringan.

Ba’zilar nima endi bu qizil kostyum, masxarabozga o‘xshab shartmidi kiyish, deb yozganlarni ko‘rdim. Ammo qizil rangni juda nufuzli odamlar ham kiygan, agar bu narsani kiyish mumkin bo‘lmaganida, balki ular ham kiyishmasdi. Qizil rangni yaxshi ko‘rganim uchun kiydim.

Imron, xonanda

Vohidjon Isoqov to‘yidan so‘ng jarima to‘lagani haqida

Xonanda Vohidjon Isoqov 2020-yilning 14-sentabr kuni Tashkent City’dagi parkda nikoh oqshomini o‘tkazgan edi.

O‘sha vaqtda karantin qoidalari kuchaytirilgan va “to‘ydagi mehmonlar soni 30 kishidan oshmasin, to‘y uyda o‘tkazilsin” degan talab qo‘yilgan bir vaqtda Vohidjon Isoqov o‘z to‘yini poytaxt markazida dabdaba bilan o‘tkazgani, bir necha kun jamoatchilik diqqat-e’tiboridagi asosiy mavzulardan biri bo‘lib turdi.

Oxir oqibat Vohidjon Isoqov 2020-yil, 16-sentabr kuni Toshkent shahar IIBB to‘yida “mehmonlar soni 50 dan oshgan” 32 yoshli Vohidjon Isoqovni Ma’muriy javobgarlik to‘g‘risidagi kodeksning 54-moddasiga (epidemiyalarga qarshi kurash qoidalarini buzish) asosan jarimaga tortgani (bunda qoidabuzarga nisbatan moddaning aynan qaysi bandi qo‘llanilgani aytilmagan), xonandaga bazaviy hisoblash miqdori (BHM)ning 5 baravari (1 115 000 so‘m)ga teng jarima belgilangani haqida xabar berildi.

“Million”chi Ma’rufjon Nosirov to‘yidan avval o‘g‘illi bo‘lgani haqida

“Million” jamoasining a’zosi, aktyor Ma’rufjon Nosirovning to‘yi to‘rt marotaba qoldirilgani ma’lum bo‘ldi. Birinchi marotaba buvisining vafoti munosabati bilan, ikkinchi marotaba karantin sabab, uchinchi marotaba to‘yga 30 ortiq mehmon chaqirib bo‘lmagani sababli va to‘rtinchi marotaba Ma’ruf Nosirovning ammasi olamdan o‘tgani uchun to‘y qoldirilgan.

Ma’ruf Nosirovning ma’lum qilishicha, buvijonisining vafotidan so‘ng, onasining roziligi bilan, ayoli bilan nikohdan o‘tgan, katta to‘y marosimi esa bir emas, to‘rt marotaba qoldirilgan. To‘yidan avval farzandli bo‘lgan Ma’ruf Nosirovning Ayyubxon ismli farzandi bor.

Aktyor Mirolim Qilichev o‘zidan kichik qizga uylangani

Aktyor Mirolim Qilichev o‘zidan 15 yosh kichik muxlisiga uylandi. Aktyor bu haqida quyidagilarni so‘zlab berdi.

Uylanish juda ham mushkul bo‘ldi. O‘ttiz uch yoshda uylandim. Bundan avval necha martalab uylanmoqchi bo‘lganman, sovchi yuborgan xonadonlarim ham ko‘p bo‘lgan. San’at sohasidagi qizlarga ham sovchi qo‘yganman, boshqa sohadagi qizlar ham bo‘lgan. Arzimagan sabablar bilan bo‘lmay qolgan. Xullas, nasib etgan kuni hozir ekan.

Ayolim bilan bir to‘yda tanishib qolganmiz, ular kelin dugona ekanlar. Bir tanishim shu qiz bilan tanishib ko‘r, juda yaxshi, aqlli qiz, degani uchun ko‘rishdik, menga har tomonlama ma’qul bo‘ldi. Keyin mana, to‘y bo‘lib ketdi.

Mirolim Qilichev, aktyor

Yigitali va  Muqaddasning yashirincha nikohi

Aktyor Yigitali Mamajonov 2018-yilda aktrisa Muqaddas Sa’dullayevaga uylandi. Yigitali Mamajonov Muqaddas Sa’dullayevaga uylanganini keng jamoatchilikdan deyarli bir yil yashirib yurdi.

Muqaddas Sa’dullayeva bilan turmush qurganimizni yashirib yurishning iloji yo‘qligini bilardim, ammo iloji boricha berkitishga harakat qildim. Chunki gap-so‘z bo‘lib ketishini xohlamadim. Bu haqida bilib qolishsa ham, bir muddat bizni gapirishadi va keyin hammasi joyiga tushib ketadi deb o‘ylagan edim. O‘zim xohlamagan ravishda turmushimiz shov-shuv bo‘lib ketdi.

Oilamga har xil ko‘zlar tegishini xohlamayman. Aslida ijtimoiy tarmoqlarga suratlarimizni joylashimiz ham noto‘g‘ridir balki, shuning uchun ham avvalroq bu haqida ma’lum qilgimiz, suratlarni ham joylagimiz kelmagan edi. Birinchi va ikkinchi oilam bilan ham rasmlarni joylaganimizdan so‘ng har xil gap-so‘zlar, muammolar boshlanib ketgan edi. Menimcha oila sirligicha qolishi kerak.

Yigitali Mamajonov, aktyor, kaskadyor

Aziz Rametov 200 ga yaqin san’atkorlarni jamlagan nikoh oqshomi

Aktyor Aziz Rametovning dabdabali nikoh oqshomi 2022-yil, 3-mart kuni “Osiyo Grand” to‘yxonasida bo‘lib o‘tdi.

Nikoh oqshomi 200 ga yaqin san’atkorlarni jamlagani bilan esda qolarli bo‘ldi. Aziz Rametov Shahlo Umarova ismli hunarmand qiz bilan oila qurdi. U 1993-yil tavallud topgan va Nastarin Collection brendiga asos solgan.