73 ёшида уйланган Убайдулла Омондан Азиз Раметовгача. Ўзбек шоу-бизнесида муҳокамаларга сабаб бўлган тўйлар (фото, видео)

Ўзбек шоу-бизнеси вакилларининг тўйлари дунё юлдузларининг никоҳ оқшомлари сингари катта шов-шув ва муҳокамаларга сабаб бўлади.

Сўнгги йилларда бўлиб ўтган ва муҳокамаларга сабаб бўлган никоҳ оқшомларининг бир қанчасини эслаймиз.

Ўзбекистон халқ артисти Убайдулла Омон 73 ёшида 44 ёшли қизга уйланди.

Ўзбекистон халқ артисти, «Эл-юрт ҳурмати» ордени соҳиби Убайдулла Омон 2021 йил 22 март куни 73 ёшида 44 ёшли қизга уйланди.

Никоҳ оқшоми Бухоро шаҳридаги «Тожимаҳал» тўйхонасида бўлиб ўтган ҳамда шу куни актёрнинг мучал тўйи ҳам нишонланган.

Убайдулло Омон Бухоро шаҳар Халқ таълими бўлими инглиз тили методисти ва шаҳардаги 32-умумий ўрта таълим мактаби ўқитувчиси 44 ёшли Нилуфар Шеровага уйланган. Ўзбекистон халқ артисти Нилуфар Шерованинг илк турмуши ҳисобланади. Убайдулла Омоннинг 73 ёшида уйлангани катта шов-шувларга сабаб бўлган эди.

Имроннинг 2,5 йил кутишга мажбур бўлгани, қизил кастуми муҳокама қилинган тўйи

Хонанда Имрон 2021 йил ўзидан 12 ёш кичкина Садаф исмли қизга уйланди. Энг қизиғи Имрон бўлажак турмуш ўртоғини никоҳ ёшига етиши учун 2,5 йил кутишга мажбур бўлган. Никоҳ оқшоми Бухоронинг «Мароқан» ресторанида, Тошкентнинг «Ўзбекистон» меҳмонхоналарида бўлиб ўтган эди.

«Ўзбекистон» меҳмонхонасида бўлган оқшомда хонанда Имроннинг қизил кастум кийгани катта муҳокамаларга сабаб бўлган эди. Хонанданинг ўзи ҳам интервьюларидан бирида, қизил кастум кийиш сабабини маълум қилган.

Тўй бир маротаба бўлади. Ушбу оқшомда энг севимли рангимда кийинишни хоҳладим. Албатта, куёв бола қора костюм кийиши керак, десангиз Бухородаги тўйимда қора костюм-шимда бўлганман. Қизил  рангли кийимни тўйларда кўпчилик кийган. Лекин биз санъаткор бўлганимиз учун бу кўпчиликка кўринган.

Баъзилар нима энди бу қизил костюм, масхарабозга ўхшаб шартмиди кийиш, деб ёзганларни кўрдим. Аммо қизил рангни жуда нуфузли одамлар ҳам кийган, агар бу нарсани кийиш мумкин бўлмаганида, балки улар ҳам кийишмасди. Қизил рангни яхши кўрганим учун кийдим.

Имрон, хонанда

Воҳиджон Исоқов тўйидан сўнг жарима тўлагани ҳақида

Хонанда Воҳиджон Исоқов 2020 йилнинг 14 сентябрь куни Tashkent City’даги паркда никоҳ оқшомини ўтказган эди.

Ўша вақтда карантин қоидалари кучайтирилган ва «тўйдаги меҳмонлар сони 30 кишидан ошмасин, тўй уйда ўтказилсин» деган талаб қўйилган бир вақтда Воҳиджон Исоқов ўз тўйини пойтахт марказида дабдаба билан ўтказгани, бир неча кун жамоатчилик диққат-эътиборидаги асосий мавзулардан бири бўлиб турди.

Охир оқибат Воҳиджон Исоқов 2020 йил, 16 сентябрь куни Тошкент шаҳар ИИББ тўйида «меҳмонлар сони 50 дан ошган» 32 ёшли Воҳиджон Исоқовни Маъмурий жавобгарлик тўғрисидаги кодекснинг 54-моддасига (эпидемияларга қарши кураш қоидаларини бузиш) асосан жаримага тортгани (бунда қоидабузарга нисбатан модданинг айнан қайси банди қўлланилгани айтилмаган), хонандага базавий ҳисоблаш миқдори (БҲМ)нинг 5 баравари (1 115 000 сўм)га тенг жарима белгилангани ҳақида хабар берилди.

«Миллион»чи Маъруфжон Носиров тўйидан аввал ўғилли бўлгани ҳақида

«Миллион» жамоасининг аъзоси, актёр Маъруфжон Носировнинг тўйи тўрт маротаба қолдирилгани маълум бўлди. Биринчи маротаба бувисининг вафоти муносабати билан, иккинчи маротаба карантин сабаб, учинчи маротаба тўйга 30 ортиқ меҳмон чақириб бўлмагани сабабли ва тўртинчи маротаба Маъруф Носировнинг аммаси оламдан ўтгани учун тўй қолдирилган.

Маъруф Носировнинг маълум қилишича, бувижонисининг вафотидан сўнг, онасининг розилиги билан, аёли билан никоҳдан ўтган, катта тўй маросими эса бир эмас, тўрт маротаба қолдирилган. Тўйидан аввал фарзандли бўлган Маъруф Носировнинг Айюбхон исмли фарзанди бор.

Актёр Миролим Қиличев ўзидан кичик қизга уйлангани

Актёр Миролим Қиличев ўзидан 15 ёш кичик мухлисига уйланди. Актёр бу ҳақида қуйидагиларни сўзлаб берди.

Уйланиш жуда ҳам мушкул бўлди. Ўттиз уч ёшда уйландим. Бундан аввал неча марталаб уйланмоқчи бўлганман, совчи юборган хонадонларим ҳам кўп бўлган. Санъат соҳасидаги қизларга ҳам совчи қўйганман, бошқа соҳадаги қизлар ҳам бўлган. Арзимаган сабаблар билан бўлмай қолган. Хуллас, насиб этган куни ҳозир экан.

Аёлим билан бир тўйда танишиб қолганмиз, улар келин дугона эканлар. Бир танишим шу қиз билан танишиб кўр, жуда яхши, ақлли қиз, дегани учун кўришдик, менга ҳар томонлама маъқул бўлди. Кейин мана, тўй бўлиб кетди.

Миролим Қиличев, актёр

Йигитали ва  Муқаддаснинг яширинча никоҳи

Актёр Йигитали Мамажонов 2018 йилда актриса Муқаддас Саъдуллаевага уйланди. Йигитали Мамажонов Муқаддас Саъдуллаевага уйланганини кенг жамоатчиликдан деярли бир йил яшириб юрди.

Муқаддас Саъдуллаева билан турмуш қурганимизни яшириб юришнинг иложи йўқлигини билардим, аммо иложи борича беркитишга ҳаракат қилдим. Чунки гап-сўз бўлиб кетишини хоҳламадим. Бу ҳақида билиб қолишса ҳам, бир муддат бизни гапиришади ва кейин ҳаммаси жойига тушиб кетади деб ўйлаган эдим. Ўзим хоҳламаган равишда турмушимиз шов-шув бўлиб кетди.

Оиламга ҳар хил кўзлар тегишини хоҳламайман. Аслида ижтимоий тармоқларга суратларимизни жойлашимиз ҳам нотўғридир балки, шунинг учун ҳам аввалроқ бу ҳақида маълум қилгимиз, суратларни ҳам жойлагимиз келмаган эди. Биринчи ва иккинчи оилам билан ҳам расмларни жойлаганимиздан сўнг ҳар хил гап-сўзлар, муаммолар бошланиб кетган эди. Менимча оила сирлигича қолиши керак.

Йигитали Мамажонов, актёр, каскадёр

Азиз Раметов 200 га яқин санъаткорларни жамлаган никоҳ оқшоми

Актёр Азиз Раметовнинг дабдабали никоҳ оқшоми 2022 йил, 3 март куни «Осиё Гранд» тўйхонасида бўлиб ўтди.

Никоҳ оқшоми 200 га яқин санъаткорларни жамлагани билан эсда қоларли бўлди. Азиз Раметов Шаҳло Умарова исмли ҳунарманд қиз билан оила қурди. У 1993 йил таваллуд топган ва Nastarin Collection брендига асос солган.