Bollivud yulduzi Shridevining qizlari Janvi Kapur va Kxushi Kapur: ular onasining muvaffaqiyatini takrorlay oladimi?

“Chandni”, “Janob Hindiston”, “G‘amgin hikoya”, “Inglish Vinglish” va boshqa ko‘plab filmlarda tomoshabinlarga ramziy rollarni taqdim etgan Shridevi 2018-yilning 24-fevralida tasodifan vannada cho‘kib ketib, bu dunyoni tark etdi. Uning so‘nggi filmi “Ona” bo‘lib, o‘limidan so‘ng Shridevi “Eng yaxshi ayol roli” uchun Milliy mukofot bilan taqdirlangan, deb yozadi Bollywoodtime.

Shridevi hind kinosining haqiqiy afsonasi bo‘lib, u Bollivudning birinchi xonimi deb atalgan. Uning Bollivudda ham, janubda ham mislsiz mashhurligi aktrisani birinchi super yulduzga aylantirdi.

Marhum aktrisa Bollivud qirollik oilasida tug‘ilmagan bo‘lsa-da, u ahil va katta Kapurlar oilasiga mansub prodyuser Boni Kapurning rafiqasi bo‘lish orqali bunga erishdi. Ammo aktrisa mashhurligining cho‘qqisiga chiqqan vaqtda ko‘pincha  gazetalarning sarlavhalaridan joy olardi. Uning Mitxun Chakraborti bilan ishqiy munosabatda bo‘lgani, o‘zidan 8 yosh katta prodyuser bilan to‘satdan turmush qurishi va to‘ydan ikki oy o‘tib qiz tug‘ilishi haqidagi mish-mishlar uzoq vaqt davomida shov-shuv bo‘lgan.

Bir muncha vaqt o‘tgach, Shrideviga bo‘lgan e’tibor susaydi. U ikki qizi — Janvi va Kxushini dunyoga keltirdi, o‘zi esa kinoni tark etib, onalik vazifasini ado etdi. 1997-yil 6-martda onasining kelajakdagi taqdirini hal qilgan katta qizi — Janvi tug‘ilgan.

Gap shundaki, Shridevi Janviga hali turmushga chiqmasdan avval homilador bo‘lgan. So‘nga tug‘ilajak bolaning otasi — prodyuser Boni Kapurga turmushga chiqqan, afsuski, Kapurning ham birinchi turmushidan ikki farzandi — o‘g‘li Arjun va qizi Anshula bor edi.

Bonining rafiqasi Mona Kapur ajrashishni qat’iyan rad etdi, lekin u Shridevi farzand kutayotganini bilgach, nikohi butunlay buzilib, hammasi tugaganini tushundi. Shridevi 33 yoshida turmushga chiqdi va oradan bir yarim oy o‘tgach, to‘ng‘ich qizi Janvi dunyoga keldi.

Aktrisa 2000-yil 5-noyabrda 37 yoshida ikkinchi qizi Kxushini dunyoga keltirdi. Qizlar Shridevi uchun koinotning markaziga aylandi. U qizlariga juda ko‘p mehribonlik va g‘amxo‘rlik qildi.

Bugunda voyaga yetgan ikki qiz ham kino olamiga kirib kelgan, albatta, bunda ularning mashhur ota-onalari tufayli hamma narsada qo‘llab-quvvatlaydigan qarindoshlarining xizmati katta.

Yulduzlarning bolalari ko‘pincha ota-onalarining yo‘lini tanlaydi, shuning uchun Bollivud yangi iste’dodlardan mahrum emas. Janvi Kapur hatto tug‘ilmasidan oldin ham misli ko‘rilmagan shov-shuvga sazovor bo‘lgandi va hozir ham mashhurlik maqomi sari olg‘a qadam tashlamoqda. U 2018-yilda “Yurak urishi” debyut filmi bilan aktrisalik orzularini ro‘yobga chiqardi. Afsuski, Shrideviga katta ekranda qizining debyutini ko‘rish nasib etmadi.

Aktrisa o‘limidan bir yil oldin, Mid-Day’ga bergan intervyusida Janvi aktrisa bo‘lishni xohlayotganini, lekin u buni istamasligini aytib o‘tgan. “Bollivud yomon joy bo‘lgani uchun emas. Men shu sanoatning ijodkoriman. Lekin, ona sifatida, Janvining turmushga chiqishidan xursand bo‘lardim. Chunki men uchun uning baxti muhimroq, agar u aktrisa sifatida ham muvaffaqiyat qozonsa, men faxrli ona bo‘laman”.

Filmfare’ga bergan so‘nggi intervyusida Shridevi Janvi bilan munosabatlari haqida gapirib bergan: “Men Januga juda yaqinman, Kxushi esa Boneyjiga yaqinroq. Kxushi Janviga qaraganda ancha mustaqil. U doimiy ravishda otasi bilan Janu va menga qarshi chiqadi”.

To‘g‘ri, Shridevi qizining Bollivudda ijod qilishidan doim xavotirda bo‘lgan va bu qaroridan mamnun bo‘lmagan, ammo oxir-oqibat taslim bo‘lishga majbur bo‘lgan. Janvining sanoatdagi debyuti haqida gap 2013-yilda, qiz 16 yoshda bo‘lganida boshlangan. Uni oilaviy do‘sti Karan Johar “2-kurs talabasi” filmiga taklif qilishi kerak edi. Biroq loyiha to‘xtatildi va “Yurak urishi” uning debyut filmiga aylandi, buning uchun u “Eng yaxshi debyutant” nominatsiyasi bo‘yicha Zee Cine Award mukofotini qo‘lga kiritdi.

Janvi — katta kino ishqibozi. U o‘tmishdagi aktyorlar Dilip Kumar, Madxubala, Vahida Rahman va Nutanni, hozirgi davr aktyorlari orasida u Karina Kapur, Salmon Xon va Shahid Kapurni yaxshi ko‘radi.

Birinchi filmdan keyin Janvi faol ravishda yangi loyihalar bo‘yicha shartnoma imzolamoqda. U allaqachon “Uchuvchi Gunjan Sachsena”, “Arvoh hikoyalari” va “Ruxi” filmlari bo‘lib, hozirda “Milli” trilleri prokatga tayyorlanmoqda.

Uning singlisi Kxushi Zoya Axtarning “Archi” dramasida debyut rolini ijro etmoqda. Boni Kapurning birinchi turmushidan ikki farzandi — Arjun va Janvi allaqachon kino olamida ijod qilib kelmoqda, endi navbat uning kenja qiziga keldi.

Yaqinda bergan intervyusida ota Kxushi katta opasi Janvi debyut filmi ustida ishlayotganida u ham aktrisalik haqida o‘ylay boshlaganini aytdi. “Kxushi aktrisa bo‘lish istagini Janvi 2018-yilda “Yurak urishi” filmida suratga tushishni boshlaganidan so‘ng bildirdi. Shuning uchun biz uni Nyu-Yorkdagi kino maktabiga yubordik, u yerda kasb sirlarini o‘rgandi. Agar Shridevi hayot bo‘lganida, uni ham xuddi Janvidek qo‘llab-quvvatlardi”.

Boni yana shuni ham qo‘shimcha qilib o‘tdi: “Men to‘rt farzandimni ham o‘zlari xohlagan narsani qilishga va qarorlarini qo‘llab-quvvatlashga harakat qilaman. Avvaliga men do‘st, keyin esa ota edim. Endi men ham ota, ham onaman. Qo‘limdan kelganicha harakat qilaman va umid qilamanki, biz do‘stona munosabatni saqlab qolamiz. Albatta, ular uchun qo‘limdan kelganini qilishga harakat qilaman”.

Janvi va Kxushining Anshula ismli opasi va Arjun Kapur ismli akasi bor, ularni “Ikki davlat”, “Sevgi isyonchilari”, “Panipat jangi” kabi filmlarda ko‘rish mumkin. Ularning amakivachchasi model va aktrisa Sonam Kapur, amakisi esa taniqli aktyor Anil Kapur.

Shridevining qizlari Janvi va Kxushi hozirda shon-shuhrat sari borayotgan yosh yulduzlardir. Ularning iste’dodi qanday namoyon bo‘ladi, tez orada ma’lum bo‘ladi, lekin qizlar onasining ishini davom ettirish xarakteriga ega ekanligi oydek ravshan. Garchi ular juda katta bosim ostida bo‘lsalar ham, qiyinchiliklarni osongina yengishga kuch topa oladigandek ko‘rinadi.