Ўзбекистон U-23 терма жамоаси бош мураббийи Темур Кападзе U-23 Осиё Кубоги—2022 чорак финали доирасида Ироққа қарши кечган ўйиндан кейин ўз фикрлари билан ўртоқлашди.
Эрта қизил карточка ўйинга қандай таъсир қилгани ҳақидаҚизил карточка кутилмаган ҳолат бўлди. Эрта 10 киши бўлиб қолганимиз катта қийинчилик туғдирди. Шундай бўлса ҳам йигитлар руҳан синиб қолмади, бунинг учун уларга раҳмат. Асосийси, ғалаба қозондик
Ярим финалда қайси жамоа тушишини хоҳлаётгани ҳақида
Япония ҳам, Жанубий Корея ҳам кучли. Лекин бу тақдирга боғлиқ. Ким кучли бўлса, ўша билан тўқнаш келамиз. Иккала жамоага ҳам омад тилаб қоламан.
Араб футболчиларига қарши ўйнаш ҳақида
Бу борада футболчиларга тушунтириш ишлари олиб борилади. Лекин ҳаммада ҳар хил руҳият, психология бор. Улар майдонга жанговар руҳда тушади. Ўша вазиятда дарвозабоннинг ўзи бизнинг фойдамизга қўполлик ишлаб олиши мумкин эди. Бу биз учун катта сабоқ бўлди.
Неъматовнинг кейинги ўйинда ҳам туша олмаслиги ҳақида
У жамоадаги етакчи футболчилардан бири. Унинг тажрибаси катталигини инобатга олсак, бу биз учун катта йўқотиш бўлади. Футболда жамоада 23 ўйинчи бўлади. Кейинги учрашувда захира дарвозабонимиз билан керакли натижага эришишга ҳаракат қиламиз.
Қизил карточкадан кейинги ўйин ҳақида
Қизил карточка сабаб 1 киши кам бўлиб, қийин вазиятга тушиб қолдик. Йигитларга ишонар эдим. 11 киши бўлганимизда, бу ўйинда осонроқ ғалаба қозонган бўлар эдик. Ўз олдимизга қўйган мақсадимиз сари охиригача ҳаракат қилдик ва ҳақли ғалабага эришдик деб ўйлайман.
Қўшимча бўлим ва пенальтилар сериясига тайёргарлик кўрилгани ҳақида
Албатта, машғулотлар давомида пенальтилар сериясини машқ қилган эдик. Бунгача шогирдларимга ҳар қандай вазиятга тушиб қолишимиз мумкинлиги, барчасига тайёр бўлишимиз кераклиги ҳақида айтиб ўтганман. Тўғри, эрта қизил карточка олганимиз озроқ ҳаяжонга солган бўлса ҳам, бундай вазиятларга тайёрланган эдик.
ТемурКападзе, Ўзбекистон U-23 терма жамоаси бош мураббийи
Изоҳ (0)