Temur Kapadze: “Iroqqa qarshi o‘yin qo‘shimcha bo‘limlargacha cho‘zilishi mumkin”

O‘zbekiston U-23 terma jamoasi bosh murabbiyi Temur Kapadze va jamoa sardori Jasurbek Jaloliddinov U-23 Osiyo Kubogi chorak finali doirasida Iroqqa qarshi kechadigan o‘yin oldidan matbuot anjumanida ishtirok etdi.

Guruh bosqichi haqida

Har bir o‘yin o‘ziga yarasha qiyin bo‘ldi. Jiddiy raqiblar bilan o‘ynadik. Asosiysi birinchi o‘rin bilan keyingi bosqich masalasini hal qildik. Musobaqada kuchsiz jamoalar bo‘lmaydi. Bundan buyog‘iga yanada qiyin va jiddiy raqiblar kutib turibdi.

Iroqqa qarshi o‘yin juda muhim. Koreya yoki Yaponiyaning qanday kuchga ega ekanini bilamiz. Jamoamiz ham o‘ziga yarasha kuchli. Ammo ta’kidlaganimdek, bizning hozirgi e’tiborimiz Iroqqa qarshi bahsga qaratilgan.

Iroqqa qarshi o‘yin haqida

Bu jamoaning kattalari va yoshlari doimo kuchli o‘yin namoyish etib kelgan. Ularning bahsini kuzatib chiqdik. Ancha jiddiy raqib ekani bilinib turibdi. O‘z o‘yinimizni ko‘rsatib, g‘alaba qozonishga harakat qilamiz.

Pley-off bahslari haqida

Bu borada bolalarda yaxshi tayyorgarlik bor. Ertaga bahs taqdiri qo‘shimcha bo‘limlarga ham cho‘zilishi mumkin. Ular ham ruhiy, ham jismoniy tomondan ertangi uchrashuvga tayyor.

Temur Kapadze, O‘zbekiston U-23 terma jamoasi bosh murabbiyi

Murabbiyimiz aytganidek, bu yerda oson raqib bo‘lmaydi. Iroq ham kuchli jamoa. Shunga yarasha biz ham munosib tayyorgarlik ko‘ryapmiz. Yarim finalga yo‘l olish uchun bor imkoniyatimizni ishga solamiz.

Bosim haqida

Bizda hozir katta bosim yo‘q. Muxlislarimizga faqat g‘alaba kerak. Ularning kayfiyati bizning o‘yinimizga bog‘liq. Har bir g‘alabamizda ularning qo‘llab-quvvatlashini his qilyapmiz. Chorak finalga chiqib, birdan final haqida o‘ylaydigan payt emas. Bu vaziyatda konsentratsiyani yo‘qotib, mag‘lubiyatga uchrash hech gap emas. Shu bois hozir final haqida o‘ylashga erta.

Jasurbek Jaloliddinov, O‘zbekiston U-23 terma jamoasi sardori